ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
-Համաշխարհային եւ Ասիոյ ֆութպոլի զտման մրցումներուն, Սուրիոյ ֆութպոլի հաւաքականը 4-0 արդիւնքով պարտութեան մատնեց Մալտիվը: Սուրիոյ կոլերը նշանակեցին Մահմուտ Մաուաս հաթթրիք եւ Իյատ Օսման: Աւելցնենք, որ կոլերէն երեքը եղան տուգանային հարուածով:
-Անցեալ շաբթուան ընթացքին Սուրիոյ ֆութպոլի հաւաքականը հրապարակեց իր նոր նշանակը, որուն կեդրոնը կը գտնուի արծիւի գլուխ մը՝ զարդարուած Սուրիոյ դրօշին գոյներով:
-Սուրիոյ պասքեթի հաւաքականը Մոսկուայի մէջ շարունակելով իր ուսումնամարզական հաւաքը, երկու անգամ յաջողեցաւ պարտութեան մատնել Ռուսիոյ երիտասարդական հաւաքականը:
-Սուրիոյ Հանրապետական Բաժակի աւարտական մրցումին, Ուրբաթ օր Դամասկոսի մէջ Սաուրան 66-54 արդիւնքով պարտութեան մատնեց Հալէպի Ճալաաը, եւ տիրացաւ բաժակին:
-Սուրիոյ ախոյեան Թշրին խումբի մարզիչ Մահեր Պահրին միացաւ Դամասկոսի Ուահտէին, իսկ Լաթաքիոյ կազմի մարզիչ նշանակուեցաւ Թարէք Ճապպանին:
ՀԱՅԿԱԿԱՆ
ՀԱՅԱՍՏԱՆԻ ՖՈՒԹՊՈԼԻ ԴԱՇՆՈՒԹԵԱՆ ՆԱԽԱԳԱՀԸ ԱՆՈՒԱՆԱԿԱՆ ՄԱՐԶԱՇԱՊԻԿ ՆՈՒԻՐԵՑ ՄՈՎՍԻՍԵԱՆԻՆ ԵՒ ՊԱՉԱՋԵԱՆԻՆ
Նախագահ Արմէն Մելիքբեկեան Հիւսիսային Ամերիկայի ՀՖՖ-ի դեսպան Իւրա Մովսիսեանին ՝ Եւրոպայի ՀՖՖ-ի դեսպան Լեւոն Պաչաջեանին նուիրեց Հայաստանի ազգային հաւաքականի անուանական մարզաշապիկներ: Այս մասին տեղեկութիւններ հաղորդեց ՀՖՖ-ի դիմատետրի էջը:
ՄԻՋԱԶԳԱՅԻՆ
ԳԱՐԼՕ ԱՆՇԵԼՈԹԻՆ ՌԷԱԼ ՄԱՏՐԻՏԻ ՄԱՐԶԻՉ ՆՇԱՆԱԿՈՒԵՑԱՒ
Սպանիոյ մայրաքաղաքի Ռէալ Մատրիտ ակումբը խումբի մարզիչ Զենատտին Զիտանը հրաժարելէ ետք, խումբի գլխաւոր մարզիչութեան պաշտօնը կրկին վստահեցաւ նախկին մարզիչ իտալացի Գարլօ Անշելոթիին:
ՍԵՐԺԻՕ ՌԱՄՈՍ ՊԱՀԱՆՋՈՒԱԾ Է ԱՆԳԼԻԱԿԱՆ ԽՈՒՄԲԵՐԷ
Ըստ ESPN կայքէջին, Սպանիոյ հաւաքականի եւ Ռէալ Մատրիտի պաշտպանողական խաղացող Սերժիօ Ռամոսին հետ բանակցութիւններ վարելու փափաք յայտնած են անգլիական Մանչեսթըր Սիթի եւ Մանչեսթըր Իւնայթըտ խումբերը: Սիթիի մարզիչ Պիպ Կուարտիոլան ակումբի պատասխանատուներուն առաջարկած է Ռամոսին անունը, իսկ Իւնայթըտի կազմը կարիք յայտնած է Ռամոսի մակարդակով խաղացողի մը, որ պիտի օժանդակէ Հարի Մակուայրին՝ ապահով պահելու համար խումբի պաշտպանողական գիծը: Աւելցնենք, որ հաւաքականի մարզիչ Լուիս Էնրէքէն հեռացուց Ռամոսը եւրո 2020-ի մրցումներէն:
ՊԱՏՐԱՍՏԵՑ ՌԱՖՖԻ ՍԻՒԼԱՀԵԱՆ