Պայտըն-Փութին հանդիպումը կրնայ լուրջ հետեւանքներ ունենալ Միջին Արեւելքի եւ Հարաւային Կովկասի տարածաշրջաններուն համար:
Այս առումով ռուսական պաշտօնական լրատուամիջոցներ կը հաղորդեն նաեւ, որ հանդիպումներու քննարկման օրակարգին մէջ ներառնուած է Արցախի հարցը եւս:
Այս հանդիպումներուն ԱՄՆ-ի եւ Ռուսիոյ արտաքին գործոց նախարարներու մասնակցութիւնը կը վկայէ, որ երկու երկիրներու արտաքին քաղաքականութեան մէջ եւս տեղաշարժեր կ’ակնկալուին: Տեղաշարժեր, որոնք ինչպէս Սուրիոյ, այնպէս ալ Հայաստանի համար դիւանագիտական գործունէութեան խթանման անհրաժեշտութիւնը կ’ուրուագծեն, որովհետեւ բանակցութիւններու նոր առիթներ կ’ընծայեն՝ ուժերու վերադասաւորման, յարաբերութիւններու վերանայման այս ժամանակահատուածին մէջ:
Պատմական այս լրջագոյն պահերուն, սակայն, Հայաստանը չունի արտաքին գործոց նախարար, արտաքին գերատեսչութիւնը կարելիութիւն չունի քաղաքական այս մրցավազքին մէջ իր տարածքը ունենալու:
Յատկապէս Արցախի հարցով, երբ մէկ կողմէ ԵԱՀԿը կը յայտնէ իր հովանաւորութեան ներքոյ բանակցութիւններու շարունակման կարեւորութիւնը, միւս կողմէ Փութին – Պայտընի հանդիպումին օրակարգ կը դառնայ Լեռնային Ղարաբաղի հարցը, Հայաստանի արտաքին գերատեսչութիւնը բանակցային լուրջ գործընթացներու փուլ մը կը թեւակոխէ՝ պատերազմէն վերջ ինչ որ կարելի է փրկելու, Արցախի կարգավիճակը անորոշ չթողելու եւ թուրք-ատրպէյճանական ոտնձգութիւններուն առաջքը առնելու համար:
Դժբախտաբար, սակայն, արտաքին գերատեսչութեան գործունէութիւնը սահանափակուած է ամէնէն ճակատագրական այս օրերուն: Բանակցող արտաքին գործոց նախարար չունի մեր երկիրը, բանակցութիւններու կարելիութիւնները, ճկուն նախարարներով, միասնական ուժերով զօրանալու եւ տարբեր կողմերու հետ բանակցելու, առաւելութիւններ ձեռքբերելու առիթը կը կորսնցնէ մեր երկիրը, փոխարէնը ներքին լարուածութիւններու ալիքի սրման ներկայ իշխանութիւններու ջղագրգիռ յայտարարութիւններով, վիրաւորանքներով եւ սրբութիւններու ոտնակոխումով կը թունաւորուի Հայաստանի ներքին քաղաքական դաշտը:
Այս առիթներէն առաւելագոյնս կ’օգտուի Թուրքիան, որուն նախագահը Շուշի այցելելով, Արցախի պատմական մայրաքաղաքին՝ Շուշիի մէջ դեսպանատուն բանալու մասին իսկ բարձրաձայն խօսելով ասպարէզ կը կարդայ Հայաստանին:
Ցաւօք, Հայաստանի արտաքին քաղաքականութիւնը, արտաքին գործոց նախարարի չգոյութեամբ, ռազմավարական բացակայութիւն մը կ’արձանագրէ այն պահուն, երբ արտաքին քաղաքական օրակարգերը օրըստօրէ կը յագենան տարածաշրջանին վրայ ազդեցութիւն բանեցնող ուժերու նոր համաձայնութիւններուն հետ զարգացող օրակարգերով:
Իշխանափոխութիւնը հրամայական է շուտափոյթ սրբագրումներու ճամբայ հարթելու։