Շաբաթ, 17 Յուլիս 2021-ին, Սուրիոյ նախագահ տոքթ. Պաշշար ալ Ասատ նախագահական չորրորդ շրջանի սահմանադրական իր երդումը կատարեց։
Երդման հանդիսաւոր արարողութեան ներկայ էին Սուրիոյ խորհրդարանի անդամներ, քաղաքական, կուսակցական, ակադեմական, մշակութային եւ լրատուական մարզերու ներկայացուցիչներ, քրիստոնեայ եւ իսլամ կրօնապետներ, ինչպէս նաեւ նահատակներու եւ վիրաւորներու ընտանիքներ։
Նախագահական պալատին յատուկ հրաւէրով, Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեան, ինչպէս նաեւ Սուրիոյ Խորհրդարանի հայ երեսփոխաններ՝ տիար Ժիրայր Րէիսեան, դոկտ. Նորա Արիսեան, դոկտ. Լիւսի Իսկէնեան եւ ՍՕ Խաչի Շրջ. Վարչութեան անդամ Լենա Էլէյճեան եւս ներկայ էին երդման արարողութեան:
Յետ երդման արարողութեան, նախագահ Ասատ ճառ մը արտասանեց, որուն ընթացքին ըսաւ.
«Կ’ոջունեմ ձեզ անկումով յատկանշուող այս ժամանակներուն՝ կայուն հայրենիքիս անունով, դատարկաբանութիւն տարածող այս ժամանակներուն՝ փառապանծ հայրենիքիս, արեան գնով երկիրը պաշտպանող ու զայն իր սրտին ու հոգւոյն մէջ պահող ժողովուրդիս անունով»։
Ապա շեշտեց, որ Սուրիոյ ժողովուրդը պատերազմի տասը տարիներուն իր գիտակցութեամբ հաստատեց, որ ազատութեան ճամբան բռնած ժողովուրդները ետդարձ չունին, որքան ալ դժուարութիւններու հանդիպին։
Նախագահը այնուհետեւ դիտել տուաւ. «Սուրիոյ ժողովուրդը, որ տասնամեայ դաժան պատերազմին դէմ պայքարեցաւ եւ յաջողեցաւ իր գրաւուած հողերուն մեծամասնութիւնը վերազատագրել, այսօր անկասկած կարողութիւնը ունի վերականգնելու նաեւ իր տնտեսութիւնը, հակառակ ներկայ դժուար պայմաններուն»։
Ապա աւելցնելով ըսաւ, որ սուրիական բռնագրաւուած մնացեալ հողերը ահաբեկչութենէն, ամերիկեան եւ թրքական ուժերէն ազատագրելը մեր առաջնային մարտահրաւէրն է։ Բռնագրաւիչ ուժերը պատերազմի սկզբնական շրջանին ջանացին ահաբեկչութեամբ սարսափի մատնել մեր ժողովուրդը եւ Սուրիոյ քաղաքացին վերածել վարձկանի, որպէսզի ան վաճառէ իր հայրենիքը եւ դառնայ թշուառ եւ դժբախտ իր իսկ երկրին մէջ, սակայն Սուրիոյ վեհանձն ժողովուրդը չտարուեցաւ այդ խաբուսիկ արարքներով եւ տիրութիւն ըրաւ իր հայրենիքին։
Իր արտասանած ճառին մէջ նախագահ Ասատ ընդգծեց երկրին քաղաքական եւ տնտեսական ուղղութիւնները յառաջիկայ 7 տարիներուն ընթացքին։ Նախագահը շեշտեց, որ Սուրիոյ տնտեսութեան կայունացման ամենամեծ արգելքներէն մէկն ալ սուրիացիներու շուրջ 40-60 միլիառ ամն տոլարի արժողութեամբ գումարներու Լիբանանի դրամատուներուն մէջ պահ դրուած ու արգելափակուած ըլլալն է։ ԱՄՆ-ի տոլարին դիմաց սուրիական լիրայի փոխարժէքին կայունացման անդրադառնալով նախագահը ըսաւ . «Սուրիական լիրայի փոխարժէքի պահպանման արշաւը փաստեց, որ կարողութիւններ ունինք, սակայն աւելի արդիւնաւէտ գործելու ծրագիր պէտք է մշակել եւ յարմար պայմաններ ստեղծել սուրիական լիրային արժէքը պահելու համար»։ Ան յայտնեց, որ Սուրիոյ տնտեսական պաշարումը ոչ միայն կը դժուարացնէր ժողովուրդին հիմնական կարիքներու ապահովումը, այլեւ կը խեղդէր զինք։ Ապա ըսաւ, որ Սուրիոյ տնտեսական պատժամիջոցներու վերացումը անհրաժեշտ է, սակայն երկրի տնտեսութեան արտադրական ոլորտին զարգացումը իրավիճակի բարելաւման կրնայ նպաստել։
Անդրադառնալով արդիւնաբերական ոլորտին, նախագահ Ասատ յայտնեց, որ ներկայիս Սուրիոյ մէջ արդիւնաբերական ծաւալուն հաստատութիւններուն թիւը 3300-ի սահմանը անցած է։ Ան հաստատեց, որ յառաջիկայ փուլին ներդրումները պիտի կեդրոնանան այլընտրանքային ջերմուժի ապահովման վրայ՝ ջերմուժը էական համարելով երկրի տնտեսական ծրագիրներու իրականացման ճամբուն։
Այս առիթով նախագահը ըսաւ. «Յառաջիկայ փուլը պիտի կրէ «արտադրութեան բարելաւում» վերնագիրը։ Հոս պետութեան պարտականութիւնն է ներդրումային ծրագիրներու հորիզոնը ընդլայնել։ Համահաւասար կարեւորութիւն կը ներկայացնեն նաեւ գիւղատնտեսական եւ արդիւնաբերական հատուածները»։
Եզրափակելով իր ճառը նախագահը յայտնեց, որ Սուրիա երախտապարտ է իր դաշնակիցներուն՝ Իրանի եւ Ռուսիոյ, սուրիական հողերու ազատագրման իրենց ներդրումին համար։