Սուրիոյ ներկայ տնտեսական վիճակը կը շարունակուի մնալ անկայուն, ժողովուրդէն խլելով իր բնականոն առօրեան ապրելու իրաւունքը: Ասկէ անմասն չի մնար հալէպահայը: Թէեւ աշխատասէր ժողովուրդը կը փորձէ համակերպիլ՝ տագնապի իւրաքանչիւր փուլէն ելք մը գտնելով, սակայն դժուարութիւնները աւելի արագ կը բազմապատկուին:
Տնտեսական այս վիճակին մէջ, բարեսիրական հաստատութիւնները կը փորձեն որոշ չափով սատարել կարիքաւորներուն: Ժողովուրդին մատուցուող նման ծառայութիւններէն եռամսեայ կեանք ունեցող «Յոյս» ծրագիրին ծանօթանալու համար, «Գանձասար» հանդիպում ունեցաւ Բերիոյ Հայոց Թեմի Ընկերային Ծառայութեան խորհուրդի ատենապետ՝ սրտաբան Պերճ Գասապեանի հետ:
«Խորհուրդս 3 ամիսէ ի վեր ձեռնարկած է «Յոյս» ծրագիրին, որուն նպատակն է նորակազմ ընտանիքներուն օգտակար դառնալ՝ անոնց նորածիններուն անհրաժեշտ սկզբնական պէտքերը տրամադրելով: Մինչեւ օրս, ամսական հերթականութեամբ 90 մանուկներ (նորածին-մինչեւ մէկ ու կէս տարեկան) ստացան անհրաժեշտ կարիքներ(հականեխիչ,… տակաշոռ)»:
«Յոյս»ը ծնունդ առաւ շնորհիւ երկրէս դուրս կայք հաստատած հալէպահայ բարերարի մը, որ մտահոգուելով Սուրիոյ տնտեսական վիճակով եւ սղաճին լոյսին տակ ընտանիք կազմող երիտասարդներով, որոշեց իր լուման նուիրաբերել հալէպահայ նորակազմ ընտանիքներու օժանդակութեան ու այս առաքելութիւնը վստահիլ Բերիոյ Հայոց Թեմի Ընկերային Ծառայութեան Խորհուրդին: Տոքթ. Պերճ բարձր գնահատեց այս ներրդրումը ըսելով. «Իսկապէ՛ս կ’ուրախանանք այն իրողութեան համար, որ տակաւին կան երիտասարդներ, որոնք կը հետաքրքրուին իրենց ծննդավայրով, իրենց սրտերը կը բաբախին Հալէպով, կը տագնապին անոր դժուարութիւններով եւ օգտակար դառնալու միջոցներ կը գտնեն: Հետզհետէ ընտանիք կազմելը կը դժուարանայ, յատկապէս՝ զաւակներու տարբեր տարիքի հոգատարութիւնը: Բայց եւ այնպէս կեանքը կը շարունակուի, երիտասարդութիւնը յամառօրէն տոկալով այս պայմանները կը փորձէ յաղթահարել:»
Յիշենք, որ Ընկերային Ծառայութեան Խորհուրդի աշխատանքներուն մաս կը կազմէ նաեւ առողջապահական-բժշկական օժանդակութիւններ մատուցելը, համագործակցաբար (Salt) հաստատութեան: Հիմնուելով վերջին թիւերուն վրայ, տոքթ. Պերճը յայտնեց.«Շնորհիւ հաստատութեան ֆինանսաւորման, 400 անհատի հերթաբար կը տրամադրուի դեղորայք, իսկ վերջին 4 ամիսներուն ընթացքին 150 հիւանդի գործողութեան գումարի աջակցութիւն»:
Ողջունելի նախաձեռնութիւն է անցնող տարուընէ մինչեւ այսօր ՀՅԴ Բ.ի օժանդակութիւնը պսակաձեւ ժահրի համաճարակով վարակուողներու պարագաներուն: «Համաճարակի յաղթահարումը լուրջ մարտահրաւէր էր մեզի համար: Տագնապալի վիճակը մեզ հրաւիրեց տէր կանգնելու մեր առաքելութեան իբր բժշկական բնագաւառէն ներս ծառայող զինուորներ: Մինչեւ այսօր հայ ազգի զաւակներէն 150 անհատի յաջողած ենք օգտակար դառնալ, տրամադրելով դեղորայք, թթուածինի շիշեր եւ հիւանդանոցի դիւրութիւններ»:
Խորհուրդի աշխատանքներուն մաս կը կազմեն նաեւ ընտանեկան հարցերու լուծման միջնորդութիւնը, կտակարարներու հոգատարութիւնը, երիտասարդ տարրին աշխատանքի միջոցներու որոնումը, եւ այլն:
Բժիշկը կոչ ուղղեց մեր ժողովուրդի զաւակներուն չտատամսիլ որեւէ օգնութեան դիմելու. «Ազգ. Առաջնորդարանէն ներս Խորհուրդիս գրասենեակը բաց է մեր ազգի զաւակները ընդունելու ամէն օր առտուընէ մինչեւ կէսօրուան ժամը 1:00, բացի կիրակի օրերէն:»
Ներկայ կացութիւնն ու այս թիւերը մտածել կու տան, թէ մինչեւ ե՞րբ ոմանք պիտի ստիպուին ապաւինիլ նման օժանդակութիւններու. Տարեցը՝ իր դեղորայքը ապահովելու, թշուառ հիւանդը գործողութեան գումարը եւ երիտասարդը իր բազմաթիւ ծախսերէն փոքր բաժին մը ապահովելու: Պատերազմի տարիներէն, ոմանց համար օժանդակութիւն ստանալը դարձաւ կեանքի ձեւ, պարտադրանքի տակ պահելով օժանդակող կողմը, նոյնիսկ երբ կարիքաւորին վիճակը մասամբ մը բարելաւուի։ Ուրիշներ, կարիքաւոր ըլլալով մէկտեղ անընդունելի կը համարեն օժանդակութեան խնդրանքն ու նուիրումը, որովհետեւ իրենց արժանապատուութիւնը աւելի բարձր կը դասեն: Սղաճն ու տնտեսական անկայուն կացութիւնը, սակայն, հետ-զհետէ կը շեշտեն նման օժանդակութիւններու կարիքն ու կարեւորութիւնը գաղութի ֆիզիքական գոյատեւման համար: Այդուամենայնիւ, օժանդակութիւնները կը մնան առժամեայ հնարք, պատասխանատու մարմինները ուղղելով մնայուն լուծումներու որոնման:
Արդե՞օք ներքին նախաձեռնութիւններով եւ ինքնաշխատութեամբ կարելի պիտի ըլլայ մասամբ ձեռբազատիլ նման դիմումներէ: Մեր աշխատասէր երիտասարդութիւնը կարողութիւն ու պատրաստակամութիւն ունի իր ճակտի քրտինքով հոգալու իր օրապահիկը, սակայն ներկայ պայմաններու իւրաքանչիւր զարգացում ոմանց կը ստիպէ «Յոյսեր»ու դիմել: Յոյս կա՞յ, որ «Յոյս»երէն ձերբազատինք օր մը… :
Սեւանայ Հալլաճեան