Թուրքիոյ ծաւալապաշտական ախորժակները բազմիցս յայտարարուած են նախագահին եւ անոր կողմնակից քաղաքական գործիչներուն կողմէ:
Այդ ախորժակները սանձող իրաւական հիմնական արգելքը Սեւրն է: Սեւրի դաշնագիրը օրինական, միջպետական փաստաթուղթ է, քանի որ այս փաստաթուղթին վրայ խարսխուած են թէ՛ Հայաստանի եւ թէ միջինարեւելեան շարք մը երկիրներու Համաշխարհային Առաջին Պատերազմին յաջորդող որոշ ժամանակահատուածի կամ ներկայի կարգավիճակները, մասնաւորապէս՝ Սուրիոյ (ներկայիս՝ Սուրիա-Լիբանան) եւ Միջագետքի (ներկայիս՝ Իրաք-Քուէյթ), Պաղեստինի (ներկայիս՝ Իսրայէլ եւ Պաղեստին), Հիճազի (ներկայիս՝ Սէուտական Արաբիա), Եգիպտոսի, Սուտանի, Կիպրոսի, Մարոքի, Թունուզի եւ Լիպիոյ: Փաստաթուղթը ստորագրուած է յիշեալ երկիրներուն կողմէ, ինչ որ պարտաւորութիւն կը թելադրէ ստորագրող երկիրներուն, մանաւանդ որ հետագային չեղեալ չէ համարուած ան:
Սեւրի հաշտութեան դաշնագիրը այսօր ալ կը մնայ իբրեւ կարեւոր փաստաթուղթ՝ Հայկական հարցի լուծումին եւ հայ ժողովուրդի իրաւունքներու վերականգնումին համար:
Այս մէկը քաջ իմանալով, Թուրքիոյ նախագահը մէկէ աւելի առիթներով կը բողոքէր Սեւրին դէմ, պարզելով անկախ երկիրներու տարածքներու բռնագրաւման իր իշխանութեան նկրտումները:
«Մենք մէկ դար առաջ պատռած ենք Սեւրը, այսօր ալ միջերկրականի մէջ մեզի պարտադրուիլ փորձուող Սեւրին առջեւ գլուխ չենք կրնար խոնարհեցնել», կը յայտարարէր ան 2020-ին միջերկրականի մէջ Թուրքիոյ ստեղծած հարցերուն առիթով:
«Սեւրի մտատանջութեամբ» տառապող Թուրքիոյ մէջ մեծ աղմուկ բարձրացուցած էին Սեւրի դաշնագիրի ստորագրման 100-ամեակին առիթով Հայաստանի կողմէ կատարուած յայտարարութիւնները: Սեւրի դաշնագիրը կ’առնչուի նաեւ Յունաստանին. ըստ այս դաշնագիրին, Իզմիրի (Զմիւռնիա) շրջանը եւ Պոլսոյ շրջանին մեծ մասը պէտք էր անցնէին Յունաստանի վերահսկողութեան տակ:
Այլ առիթով մը Օգոստոս 2020-ին, Էրտողանի գաղափարակից Մեթին Քիւլիւնք «Թուիթըր»ի վրայ կոչ ուղղած էր՝ ստեղծելու Մեծն Թուրքիա, որ կ’ընդգրկէ հիւսիսային Յունաստանը եւ Եգէական ծովու արեւելեան կղզիներու մեծ տարածքները, Պուլկարիոյ, Կիպրոսի եւ ամբողջ Հայաստանի կէսը, ինչպէս նաեւ Վրաստանի, Իրաքի եւ Սուրիոյ բազմաթիւ տարածքներ:
Քիւլիւնք շարք մը գրառումներով կը գովերգէր 1071 թուականին Բիւզանդական կայսրութեան դէմ Մանազկերտի մէջ սելճուքներու տարած յաղթանակը, ինչ որ արտօնած է ասիացի թուրքերուն պատմութեան մէջ առաջին անգամ ըլլալով մուտք գործել Հայկական լեռնաշխարհ եւ Փոքր Ասիա:
Թուրքիոյ Հանրապետութեան քաղաքական այրերուն քայլերը ուղղուած են այս ախորժակներու բաւարարման: Թուրքիան պիտի ջանայ շահագործել իր ծովային սահմաններու մէջ գտնուող բնական կազի եւ քարիւղի պաշարները, տարածքներ բռնագրաւելով սահմաններու ճանաչում պարտադրել շարք մը երկիրներու, ինչպէս օրինակ Հայաստանի՝ Արցախի հարցը շահագործելով, Հայաստանի սահմաններու ապահովութեան սպառնալով, Սուրիոյ՝ քրտական հարցին պատրուակով, ու իր բոլոր խաղաքարտերը պիտի օգտագործէ ճնշում բանեցնելու Եւրոպայի, Ռուսիոյ եւ արաբական աշխարհին վրայ:
Այս բոլորին դէմ դնելու համար հակաթրքական խաղաքարտեր եւ խլուած իրաւունքներ ունեցող երկիրներու գործակցութեան ոլորտը զարգանալու բազում առիթներ կորսնցուցած է արդէն:
Ե՞րբ պիտի կարենանք շօշափել հակաթուրք երկիրներու ծրագրեալ գործակցութիւնը: Այդ գործակցութիւնը նոր ուժականութիւն կրնայ հաղորդել Թուրքիոյ սանձարձակ ծաւալապաշտութեան դէմ դնող կողմերուն: