24-26 Օգոստոսին Ազգային ժողովում քննարկուեց եւ իշխող ուժի կողմից ընդունուեց կառավարութեան, այսպէս կոչուած, ծրագիրը, որն առկայ ծայրայեղ մարտահրաւէրների վերաբերեալ կիրառական լուծումներ չէր պարունակում, աւելի՛ն` պարունակում է լուրջ վտանգներ: Քննարկման ընթացքում բարձրացուեցին հանրութեանը յուզող մի շարք հարցեր, որոնց հիմնականում տրուեցին իշխանութիւններին բնորոշ` սուտ կամ խուսափողական պատասխաններ: Աւելի՛ն` 25 Օգոստոսին, իշխանական խմբի կողմից նախապէս ծրագրուած ուղղակի խուլիկանական, քրէօրէն հետապնդելի արարքներ տեղի ունեցան ընդդիմադիր խմբակցութեան պատգամաւորների նկատմամբ` որոշակի յարձակուող անձանց դերաբաշխմամբ: Ընդգծենք, որ նշուած արարքի կանխարգելման համար իրաւասու մարմնի պարտականութիւնների կատարումը տեղի ունեցաւ դիտաւորութեամբ ուշացած: Նման արարքը տեղի ունեցաւ մտքերի փոխանակութեան փուլում` նպատակ հետապնդելով հերթական անգամ բռնապետական վարչակարգի արմատաւորումը անգամ խորհրդարանում: Ծանօթանալով գլխաւոր դատախազութեան տարածած հաղորդագրութեանը` արձանագրում ենք, որ ինչպէս նախկինում, այնպէս էլ սոյն դէպքում իշխանական խմբի ոեւէ ներկայացուցչի նկատմամբ մինչ օրս առկայ չէ որեւէ քրէադատավարական հարկադրանքի միջոցի իրացում: Տեղին է յիշեցնել, որ իբրեւ կառավարութեան ծրագիր հանդիսացող փաստաթղթում բառացի նշուած էր, որ դատարանները, դատախազութիւնը եւ քննչական մարմինները «պիտի ապահովեն կառավարութեան` ժողովրդից ստացած լիազօրագրի իրագործումը», այլ կերպ ասած` արդէն իսկ իրաւապահ մարմինների անկախութեան վերացումը ծրագրային դրոյթ է: Արձանագրում ենք` Սիւնիքում միջպետական ճանապարհի այսօրուայ հերթական խայտառակ վիճակի, Ազգային ժողովում տեղի ունեցած լկտի, քրէօրէն հետապնդելի արարքի եւ հնարաւոր աղէտների ամբողջ պատասխանատուութիւնը կրում է այս իշխանութիւնը` Նիկոլ Փաշինեանի գլխաւորութեամբ:
«ՀԱՅԱՍՏԱՆ» ԴԱՇԻՆՔ
«ՊԱՏԻՒ ՈՒՆԵՄ» ԴԱՇԻՆՔ