Շաբաթ, 4 Սեպտեմբեր 2021-ին, ՍԱՆԱ հաղորդեց, որ Սուրիոյ պատերազմին հետեւանքով տասնամեայ ընդմիջումէն ետք, այսօր Հալէպի Միջազգային Օդակայան պիտի ժամանէ Երեւան-Հալէպ առաջին օդանաւը։
Օդակայանի քաղաքային թռիչքներու բաժինի տնօրէն Պասէմ Մանսուր ՍԱՆԱ-ի թղթակիցին յայտնեց, որ նախապէս Սուրիա եւ Հայաստան համաձայնութիւն կնքեցին երկու երկիրներուն միջեւ օդային թռիչքները վերաշխուժացնելու համար, եւ ահաւասիկ այսօր Հալէպ-Երեւան, Երեւան-Հալէպ առաջին թռիչքը տեղի պիտի ունենայ։
Ան աւելցուց, որ Երեւան-Հալէպ ուղղակի թռիչքը ճամբորդութեան շարժումը պիտի դիւրացնէ եւ անոր ծախսը պիտի նուազեցնէ, ինչպէս նաեւ երկու երկիրներուն միջեւ տնտեսական եւ մշակութային փոխանակումները պիտի բազմապատկէ, յատկապէս, որ Հայաստանի մէջ գտնուող սուրիացիներուն մեծամասնութիւնը Հալէպէն գաղթած է։
Յիշենք, որ Հալէպի Միջազգային Օդակայանը բանիլ սկսաւ 19 Փետրուար 2020-ին, իննամեայ դադրեցումէն ետք։