Առաջին անգամ չէ որ Երեւան կը գտնուիմ, ուստի զբօսաշրջիկի հոգեբանութեամբ չէ որ կը թափառիմ այս քաղաքին մէջ, կամ նոր բան մը կ’ուզեմ տեսնել հոս: Այս անգամուան քաղաքի եռուզեռը, սակայն, ապշեցնող կը գտնեմ՝ թաղերը զբօսաշրջիկներով լեցուն են:
Երբեմն ինքնաշարժներով խճողուած շարակարգերը տեսնելով, կը կարծեմ թէ Լիբանանի մէջ եմ, սակայն կը սթափիմ ու կը զարմանամ ինքնաշարժի հանդէպ տեղւոյն ժողովուրդին ունեցած անհուն սիրոյն ի տես, որուն ամէն քայլափոխի կը ծանօթանամ անցորդներուն խօսակցութիւններուն ընդմէջէն:
Միայն ինքնաշարժները չեն այս քաղաքը խճողողները: Այնպէս ինչպէս պատերազմի տարիներուն սուրիահայուն ապաստանը եղաւ հայրենիքը ու արդէն անոնցմէ ոմանք երեւանցիներ են, նոյն թափով այս անգամ ալ Լիբանանէն հոսք մը կայ: Անյոյս հայը նոր յոյսի նշոյլ մը կը փնտռէ հո՛ս՝ տնտեսական իր ճգնաժամի դժուարութիւններէն ձերբազատելու հեռանկարով: Բայց չէ՞ որ Հայաստանցին ինք եւս դժգոհ է իր իրավիճակէն ու արտագաղթելու ելքը միակ միջոցը կը գտնէ…, ուստի ինչպէ՞ս կարելի է լուծել այս համեմատութիւնը:
Ներգաղթած բարեկամուհիի մը հետ կը շրջիմ քաղաքին թաղամասերը, ու ինք պարտականութիւն կը զգայ զիս ծանօթացնել որոշ մանրամասնութիւններու, որոնք ինծի օգտակար կրնան ըլլալ: Ճամբու եզրին ցոյց կու տայ այն անտառը, որուն ծառերը իրենց երիտասարդները տնկած են, երիտասարդներուն հետ մեծցած են նաեւ ծառերը ու կը յուշէ, որ «Հակառակ այդ բոլորին մենք աղբէր ենք տակաւին»: Մենք ա՞լ աղբէր կրնանք մնալ միշտ: Սակայն կը հաստատէ, որ արդէն իրենք իրենց ճակատագիրը կապած են այս երկրին իր լաւով ու վատով:
Շուտով կը հրաւիրուիմ պսակի մը արարողութեան: Պատերազմի թոհուբոհէն փախած սուրիահայ զոյգը որոշած է հայրենիքի մէջ իր նոր տունը կազմել:
Շաբաթ մը ետք բաց հրաւէրով մը ներկայ կը գտնուիմ Կարօ Յովակիմեան Բարեգործական Հաստատութեան բացման հանդիսութեան: Իրենց նահատակ զաւկին անունով հայրենադարձ Յովակիմեան ընտանիքը, սուգի պատմուճանը նետած, ապագայ հայ մանուկին եւ հայ զինուորին ձեռք երկարելու որոշում առած է նոյն գիտակցութեամբ տոգորուած խումբի մը հետ: Անոնք իրենց պարտքը կ’ուզեն տալ հայ զինուորին, բարեխնամ ձեռք երկարել վաղուան հայորդիին եւ նոր յոյս ներշնչել անոնց:
Առաջին հերթին սահմռկած եմ իրենց քաջութենէն. հաւատքով առնուած իրենց որոշումը վարակած է շրջապատը ու անոնք կը շարունակեն նոյն ճամբով ընթանալ: Այս օրինակը տեսնելով ակամայ կը մտաբերեմ սփիւռքահայ երիտասարդին հաւատքն ու դաստիարակութիւնը… ահաւասիկ օրինակ մը, որ վերընձիւղուած է հայրենիքին մէջ ու նոր ճիւղեր կ’արձակէ:
Բայց արդեօ՞ք պատնէշ դնողներ պիտի ըլլան անոնց դէմ…
Երեւանը կ’եռայ իր սուրիահայ, լիբանանահայ եւ այլ քաղաքացիներով ու իրենց հակասութիւններով:
Զեփիւռ Պապիկեան-Աւագեան