Սուրիոյ պասքեթի աղջկանց մարզաձեւի կեանքին մէջ արձանագրուած են բազմաթիւ անուններ, որոնք երկար տարիներ շարունակ յաջողած են իրենց դրոշմը դնել սոյն մարզաձեւին զարգացման մէջ եւ իտէալը դառնալ իրարայաջորդ սերունդներուն: Սոյն ցանկին մէջ ոսկի տառերով իր անունը արձանագրեց նաեւ ՀՄԸՄ-ի նախկին խաղացող, «Սաուրա» կազմի խմբապետ Ալիսիա Մակարեանը, որ վերջերս Յորդանանի մէջ տեղի ունեցած Արաբ Ակումբներու Մրցաշարքին տիրացաւ լաւագոյն կէտ նշանակողի (Scorer) կոչումին: Ազնիւ եւ համեստ մարզիկուհին միշտ եղաւ օրինակելի ու գնահատուեցաւ բոլոր պատասխանատուներուն եւ պասքեթի մասնագէտներուն կողմէ: Ստորեւ ներկայացուած հարցազրոյցով լուսարձակի տակ կ’առնենք Ալիսիայի մարզական կեանքի վերջին զարգացումները:
«Գանձասար»- Կը շնորհաւորենք ձեր արձանագրած փայլուն յաջողութիւնը, յարգելի՛ Ալիսիա: Սովորական յաջողութենէն անդին, ի՞նչ նշանակութիւն ունի այս արդիւնքը ձեզի համար:
Ալիսիա Մակարեան- Շնորհակալ եմ ձեր քաջալերանքին համար: Խումբիս հետ արաբ ակումբներու երկրորդ դիրք գրաւելն ու լաւագոյն կէտ նշանակողի կոչումին արժանանալը շատ մեծ նշանակութիւն ունին ինծի համար, որովհետեւ այս երկրորդ անգամն է, որ կը նուաճեմ անհատական տիտղոս: Նախապէս արժանացած եմ արեւմտեան Ասիոյ լաւագոյն խաղացողի եւ կէտ նշանակողի զոյգ կոչումներուն, բայց այս անգամ տարբեր նշանակութիւն ունեցաւ, որովհետեւ եղաւ օտար եւ արհեստավարժ խաղացողներու ներկայութեան: Անձամբ շատ ուրախ եւ հպարտ եմ խումբիս յաջողութեան եւ իմ արձանագրած արդիւնքներուն համար:
«Գ.»-Ինչպէ՞ս կ’արժեւորէք մրցաշարքին կազմակերպչական աշխատանքն ու խումբերուն մակարդակը:
Ա.Մ.- Խումբերուն մակարդակը շատ բարձր էր, մանաւանդ որ խումբերուն հետ դաշտին վրայ կային երկու օտար, արհեստավարժ խաղացողներ, եւ օտար մարզիկները կրցան լաւ արդիւնքներով ներկայանալ: Մեր մարզիկները շատ լաւ էին եւ իրենց դրական ազդեցութիւնը ունեցան խումբին վրայ: Իսկ մրցաշարքի կազմակերպչական աշխատանքներուն մէջ կային որոշ բացթողումներ, սակայն մենք կրցանք համակերպիլ բոլոր պայմաններուն:
«Գ.»-Ի՞նչ նշանակութիւն ունի ձեզի համար «մանաւանդ» լաւագոյն կէտ նշանակող խաղացողի կոչումին տիրանալը:
Ա.Մ.- Մեզի հետ եղող բոլոր խումբերուն մէջ կային շատ լաւ խաղացողներ, որովհետեւ իւրաքանչիւրը իր խումբին հետ մասնակցած է տարբեր մրցաշարքերու, իսկ մենք երկար ատենէ ի վեր բաւարարուած էինք ներքին մրցաշարքերով: Այս պատճառով ես պահ մը կը կարծէի, թէ դժուար է անհատական մակարդակով կոչում մը ձեռք ձգելը: Մրցաշարքի առաջին օրէն կը հետեւէի բոլոր խաղացողներուն, իսկ խումբիս արձանագրած արդիւնքը եղաւ շատ լաւ, որովհետեւ ողջ կազմին մակարդակը շատ լաւ էր, խումբը արժանի էր այս դիրքին:
«Գ.»-«Սաուրա»ն այս տարի կրկին դարձաւ Սուրիոյ ախոյեան եւ բաժակակիր, ինչպէ՞ս կ’արժեւորէք այս արդիւնքը:
Ա.Մ.- «Սաուրա» խումբը երեք տարիէ ի վեր կը տիրանայ Սուրիոյ ախոյեանութեան եւ հանրապետական բաժակներուն: Այս մէկուն տուն տուող պատճառներէն մէկն ալ կազմի բոլոր խաղացողներուն մօտ գործակցութեան տրամադրութեան առկայութիւնն է, ինչպէս նաեւ ընդհանուր առմամբ պատասխանատու, մարզիչ եւ խաղացող բծախնդիր մօտեցումով յատկանշուիլը: Խումբին մէջ մէկս միւսը կ’ամբողջացնէ եւ ոչ մէկ խտրութիւն կայ մեր միջեւ. միշտ զիրար քաջալերող եղած ենք: Այս բոլորին մէկտեղումով մենք Սուրիոյ մէջ արձանագրեցինք փայլուն արդիւնքներ: Մեզի յոյս տուաւ այն իրողութիւնը, որ մենք կարելիութիւն ունինք նաեւ Յորդանանի մէջ ներկայանալու բարձրորակ մակարդակի խաղարկութեամբ:
«Գ.»-«Այն խումբը, որուն Ալիսիան մաս կազմէ, կը դառնայ ախոյեան»: Այս խօսքը ինչ նշանակութիւն ունի ձեզի համար:
Ա.Մ.- Այս նախադասութիւնը երբ լսեմ, հպարտութիւն կը զգամ, բայց կ’ուզեմ ըսել, որ առանձին ոչ մէկ բան կրնամ ընել, եթէ կազմիս ընկերները զիս չօգնեն, որովհետեւ պասքեթը խմբային մարզաձեւ մըն է: Այն խումբը, որ ունի լաւ խաղացողներ, նոյնիսկ անոր փորձերը յաջող կ’ընթանան, ու միայն կարելի այդ բոլորին ազդեցութիւնը երեւելի կը դառնայ խումբին մօտ:
«Գ.»-Յառաջիկայ տարեշրջանին ո՞ր խումբին մաս պիտի կազմէք, եւ արդեօ՞ք այլ ակումբներէ առաջարկներ ստացած էք:
Ա.Մ.- «Սաուրա» խումբին հետ յառաջիկայ օրերուն կ’աւարտի իմ պայմանագրութեան ժամկէտը: Նոր տարեշրջանին համար տակաւին ոչ մէկ պայմանագրութիւն ստորագրած եմ: Ունիմ երեք առաջարկ սուրիական ակումբներէ, ինչպէս նաեւ Սուրիայէն դուրս՝ երկու ակումբէ: Յառաջիկայ օրերուն կը յստականայ ուղղութիւնս՝ ընտրելու լաւագոյնը:
«Գ.»- Վերջին խօսքով, ի՞նչ կ’ուզէք ըսել «Գանձասար»ի մարզասէր ընթերցողներուն:
Ա.Մ.- Նախ կ’ուզեմ շնորհակալութիւն յայտնել «Գանձասար»ի բոլոր անձնակազմին, մանաւանդ ձեզի, որ միշտ հետեւած էք ինծի եւ ախոյեանութիւններս միշտ տեղ գտած են «Գանձասար»ի մէջ: Հպարտ եմ, որ երբ անունս յիշեն, կ’ըսեն ՀՄԸՄ-ի խաղացող: Կ’ուզեմ շնորհակալութիւն յայտնել նաեւ պասքեթի մարզական կեանքիս հիմքը դնող երկու մարզիչներուն՝ Գէորգ Արթինեանին եւ Մակի Տօնապետեանին: Շնորհակալութիւն նաեւ ծնողքիս, որ տեւաբար քաջալեր կը հանդիսանայ ինծի:
Հարցազրոյցը վարեց՝
Ռաֆֆի Սիւլահեան