«Երկիր Մետիա».-Ազգային Ժողովի պաշտպանութեան եւ անվտանգութեան հարցերու մշտական յանձնաժողովի «Հայաստան» եւ «Պատիւ Ունեմ» խմբակցութիւններու անդամներ Գեղամ Մանուկեան, Արթուր Ղազինեան, Գեղամ Նազարեան եւ Տիգրան Աբրահամեան դիմած են յանձնաժողովի նախագահին` պահանջելով յանձնաժողովի արտահերթ նիստ հրաւիրել: Դիմումը կը ներկայացնենք ստորեւ. «Ղեկավարուելով «Ազգային Ժողովի Կանոնակարգ» ՀՀ սահմանադրական օրէնքի 14-րդ յօդուածի 2-րդ մասով եւ 122-րդ յօդուածով` ՀՀ Սահմանադրութեան 14-րդ յօդուածի 1-ին մասի, «Պաշտպանութեան մասին» ՀՀ օրէնքի 6-րդ յօդուածի 1-ին մասի 3-րդ կէտի եւ «Պետական սահմանի մասին» ՀՀ օրէնքի 5-րդ, 6-րդ եւ 28-րդ յօդուածի, ինչպէս նաեւ ՀՀ կառավարութեան 2021-2026թթ ծրագրի առաջին գլխի 1.1 եւ 1.3 ենթագլուխներում նշուած նպատակների կատարման նկատմամբ խորհրդարանական վերահսկողութեան իրականացման նպատակով պահանջում ենք 15 Հոկտեմբերի 2021թ.-ի ժամը 13:00–ին հրաւիրել ՀՀ ԱԺ Պաշտպանութեան եւ անվտանգութեան հարցերի մշտական յանձնաժողովի արտահերթ նիստ` հետեւեալ օրակարգով. Լսել ՀՀ ԱԱԾ տնօրէնի, ՀՀ ԱԳ նախախարի, ՀՀ պաշտպանութեան նախարարի, ՀՀ ՊՆ Գլխաւոր շտաբի պետի, ՀՀ Գլխաւոր դատախազի զեկոյցները եւ հաշուետուութիւն-պարզաբանումները Հայաստանի հարաւ-արեւելեան սահմանին տիրող իրավիճակի վերաբերեալ: Վերոնշեալ զեկոյցների եւ հաշուետուութիւնների հիման վրայ ստեղծել աշխատանքային խումբ: Արտահերթ նիստի նպատակն է ՀՀ գործադիր իշխանութեան ներկայացուցիչներից ստանալ բացատրութիւններ եւ պարզաբանումներ հետեւեալ հարցերի վերաբերեալ. ՀՀ պաշտպանութեան նախարարն ու ՀՀ ԳՇ պետը պէտք է ներկայացնեն բացատրութիւն, թէ ինչ հանգամանքներում եւ ում հրամանով է տեղի ունեցել ՀՀ զինուած ուժերի եւ կամաւորականների դուրս բերումը 9 Նոյեմբերի 2020թ-ի դրութեամբ զբաղեցրած դիրքերից եւ ներկայացնել ռազմական էսկալացիայի վտանգի կոնկրէտ հիմքեր: ՀՀ Արտաքին գործերի նախարարը պէտք է Յանձնաժողովին ներկայացնի բացատրութիւն,թէ որքանով է ներգրաւուած եղել ՀՀ ԱԳ նախարարութիւնը այս գործընթացում, պահպանուած են եղել արդեօք ՀՀ պետական սահմանի մասին օրէնքի պահանջները եւ առկայ է եղել արդեօք ՀՀ պարտաւորեցնող որեւէ միջազգային պայմանագիր: ՀՀ գլխաւոր դատախազը պէտք է ներկայացնի բացատրութիւն ՀՀ պետական սահմանի փոփոխութեան սահմանադրա-իրաւական հիմքերի վերաբերեալ եւ ներկայացնի պարզաբանում ՀՀ քրէական օրէնսգրքի 300.2, 309 յօդուածի 3-րդ մասի եւ 299 յօդուածի հանտանիշներով քրէական գործի յարուցման կամ դրա մերժման իրաւական հիմքերի վերաբերեալ: ՀՀ ԱԱԾ տնօրէնը պէտք է ներկայացնի հաշուետուութիւն ՀՀ պետական սահմանի պահպանութեան ուղղութեամբ ՀՀ ԱԱԾ սահմանապահ զօրքերի կատարած գործողութիւնների եւ միջոցառումների վերաբերեալ եւ յստակեցնի, թէ ինչ գործողութիւններ են նախատեսւում իրականացնել ՀՀ տարածքային ամբողջականութեան վերականգնման եւ ՀՀ արտաքին սահմանների խախտման համար պատասխանատու սուբյեկտներին քրէական պատասխանատուութեան ենթարկելու համար: ՀՀ ՊԱ հարցերի մշտական յանձնաժողովի արտահերթ նիստի հրաւիրումը պայմանաւորուած է այն հանգամանքով, որ ատրպէյճանական զինուած ուժերը 16 Դեկտեմբերի 2020-ից մինչ օրս գրաւածեն ՀՀ ինքնիշխան տարածքի մի մասը, արգելափակել եւ խոչընդոտներ են ստեղծում ՀՀ եւ օտարերկրեայ քաղաքացիների ՀՀ ինքնիշխան տարածքով ազատ տեղաշարժին, սպառնում եւ ահաբեկում են այդ տարածքներում ապրող եւ Գորիս-Կապան աւտոճանապարհով երթեւեկող քաղաքացիական անձնանց: ՀՀ ԱԺ ՊԱ հարցերի մշտական յանձնաժողովի նախագահը ՊԱՐՏԱՒՈՐ Է սոյն թուականի հոկտեմբերի 15-ին հրաւիրել Յանձնաժողովի արտահերթ հիստ եւ ԵՐԱՇԽԱՒՈՐԵԼ նշուած պաշտօնատար անձանց ներկայութիւնն այդ նիստին: Հաշուի առնելով օրակարգում ներառուած հարցի կենսական կարեւորութիւնն ու հանրային մեծ հետաքրքրութիւնը, նիստը նախատեսում ենք անցկացնել դռնբաց ռեժիմով եւ չենք ակնկալում որեւէ պետական գաղտնիքի հրապարակում: Կից ներկայացւում է. Հայաստանի հարաւ-արեւելեան սահմանին տիրող իրավիճակի վերաբերեալ ՀՀ ԱԱԾ տնօրէնի, ՀՀ ԱԳ նախախարի, ՀՀ պաշտպանութեան նախարարի, ՀՀ ՊՆ գլխաւոր շտաբի պետ, ՀՀ գլխաւոր դատախազի զեկոյցների եւ հաշուետուութիւն-պարզաբանումների նախնական քննարկման, ուսումնասիրութեան եւ դրա արդիւնքները յանձնաժողով ներկայացնելու նպատակով աշխատանքային խումբ ստեղծելու մասին Հայաստանի Հանրապետութեան Ազգային ժողովի պաշտպանութեան եւ անվտանգութեան հարցերի մշտական յանձնաժողովի որոշման նախագիծ»:
