Թուրքիոյ եւ Միացեալ Նահանգներու նախագահներ Ռեճէպ Թայիպ Էրտողանն ու Ճօ Պայտընը հանդիպում պիտի ունենան Հռոմի մէջ 30-31 Հոկտեմբերին նախատեսուած Քսաններու խմբակի վեհաժողովի ծիրին մէջ:
«Ի.Էյ.Տէյլի» կը հաղորդէ, որ այս մասին թրքական «Միլլիէթ» օրաթերթին հետ հարցազրոյցի ընթացքին յայտնած է Էրտողանի բանբեր Իպրահիմ Քալըն: Վերջինս բացայայտած է նաեւ նախագահներու հանդիպման օրակարգը՝ նշելով քննարկուելիք գլխաւոր նիւթերը:
«Մենք ընդարձակ կապեր ունինք Միացեալ Նահանգներու հետ: Ղեկավարները պիտի քննարկեն քաղաքական, տնտեսական, ուժանիւթային, առեւտրական ոլորտներուն, պաշտպանութեան, արդիւնաբերութեան եւ անվտանգութեան վերաբերող հարցեր: Անոնք նաեւ պիտի քննարկեն Աֆղանիստանին, Սուրիոյ, Իրաքին, Կովկասի շրջանին եւ Ղարաբաղին առնչուող հարցերը», աղբիւրին փոխանցումով` նշած է թուրք ղեկավարին բանբերը: