Նկատի առնելով, հայկական պետութեան կործանման վտանգը ու Արցախի եւ Սիւնիքի կորուստը կասեցնելու հրամայականը` ՀՅԴ Երիտասարդականի համաշխարհային ընտանիքը դիմած է համազգային դիմադրութեան, որ հետեւողական պայքարի շնորհիւ պիտի առաջացնէ երկար սպասուած արժեհամակարգային յեղափոխութիւնը:
Նկատի ունենալով,
- թուրք-ատրպէյճանական բանթուրանական քաղաքականութիւնը, որ միտում ունի մէկընդմիշտ տարածաշրջանի քարտէզէն ջնջելու Արցախի ու Հայաստանի Հանրապետութիւնները,
- ՀՀ ապազգային, դաւադիր իշխանութիւններու ընթացքը, որ կ’առաջնորդուի միակողմանի զիջումներով` կարծեցեալ խաղաղութեան հասնելու քաղաքականութեամբ,
- Հայաստանի Հանրապետութեան ներքաղաքական փակուղին եւ այն իրականութիւնը, որ ՀՀ Ազգային ժողովի ընդդիմութեան ծաւալած գործունէութեան կողքին անհրաժեշտ է դիմել բազմաճակատ պայքարի`
ՀՅԴ Երիտասարդութիւնը որոշած է չյարմարիլ այս իրականութեան, այլ` մեկնարկել համազգային երիտասարդական դիմադրութեան շարժում` պայքարի հինգ հիմնական ճակատներով․
- Ամէնուրեք թափ հաղորդել հակաթուրք եւ հակաատրպէյճանական պայքարին,
- Գերտէրութիւններուն հասցնել այն պատգամը, որ իրենց ծրագրերը չեն կրնար իրականացնել Հայաստանի եւ հայութեան ազգային-պետական շահերու հաշուոյն,
- Կտրուկ քայլերով մերժել ՀՀ իշխանութիւններու պառակտող ու պետականակործան քաղաքականութիւնը,
- Պայքարիլ Արցախը հայաթափելու, անիկա ՀՀ-էն ու Սփիւռքէն անջատելու ատրպէյճանա-թրքական փորձերու եւ Սիւնիքէն արտագաղթի հոսանքին դէմ․ ՀՅԴ Երիտասարդականի կազմակերպած «Արցախի վերականգման ու զարգացման» եւ «Դէպի Սիւնիք» ծրագրերը այս աշխատանքի լաւագոյն ապացոյցներն են,
- Ներազգային ճակատի մէջ համախմբել, կազմակերպել հայ երիտասարդութիւն` ստեղծելով դիմադրութեան ցանցային կորիզներ:
Սիրելի՛ երիտասարդներ,
Կոչ կ’ուղղենք բոլորիդ` միանալու այս շարժման այս ճակատագրական օրերուն, բոլորս` իրաւունք չունինք մատնուելու յանցաւոր անգործութեան: Զարթօնքի եւ ազգային անկումը վերելքի վերածելու պահը հիմա՛ է:
ՀՅԴ Բիւրոյի Երիտասարդական Գրասենեակ
20.10.2021