Ազգային ժողովին մէջ լրագրողներու հետ զրոյցի մը ընթացքին, ՀՅԴ անդամ, «Հայաստան» խմբակցութեան պատգամաւոր Գեղամ Մանուկեան ըսաւ. «Եթէ Ազգային ժողովի ամպիոնը չըլլայ, 100 հրապարակ կայ: 30 տարի մեզ չեն կրցած լռեցնել, հիմա ալ չեն կրնար լռեցնել»:
Պատասխանելով այն հարցումին, թէ արդեօք նման վերաբերմունք մը միայն «դաւաճան» բառին հե՞տ կապուած էր, Գեղամ Մանուկեան ըսաւ, որ չեն կրնար արգիլել որեւէ բառ, որուն համար ինք պատասխանատու է, Ազգային ժողովի ամպիոնէն հնչեցնելու համար:
Երեքշաբթի, 26 Հոկտեմբերին, Հայաստանի Ազգային ժողովի անվտանգութեան աշխատակիցները Ազգային ժողովի փոխնախագահ Ռուբէն Ռուբինեանին հրահանգով ամպիոնէն հեռացուցին պատգամաւոր Գեղամ Մանուկեանը, որովհետեւ Խորհրդարանի ամպիոնէն ան կրկին յայտարարեց, որ Արցախը ուրացողը դաւաճան է:
«Անցնող 3 ամիսներուն Փաշինեանի երեսին ալ ըսած եմ` հողատու ես, դաւաճան ես, պիտի շարունակեմ ըսել, որովհետեւ ասիկա համոզում է: Անոնք կարմիր գիծերը անցած են, հայրենիքի անվտանգութեան, մեր ժողովուրդի միասնականութեան, արցախահայութեան իրաւունքներու կարմիր գիծերը անցած են», ըսաւ Գ. Մանուկեան:
Ըստ Մանուկեանի, իրերը իրենց անունով պէտք է կոչել, եւ ինք այդպէս ալ ըրաւ, Արցախը ուրանալը կոչեց դաւաճանութիւն, քանի որ Հայաստանի մէջ բազմաթիւ կուսակցութիւններ փոխած Վիգէն Խաչատրեանը օրերս ինքն իրեն թոյլ տուած էր ըսել, որ «Հայաստանի ապագան պայմանաւորուած է Արցախով» ձեւակերպումը սխալ է:
«Երեւի Ռուբէն Ռուբինեանը չհաւնեցաւ, որ Ազգային ժողովի ամպիոնէն Արցախ պաշտպանող պէտք է ըլլայ: Վիգէն Խաչատրեանը ինքնաբերաբար ուրացած է Արցախը, արցախեան հարցը, որուն պարագային որեւէ խելամիտ մարդ, այդ կարգին ես եւ տարեկիցներս, որոնք 30 տարի առաջ, ի տարբերութիւն խաչատրեան վիգէններու, կանգնած են Ազատութեան հրապարակին վրայ, պայքարած են Արցախի համար: Ռուբէն Ռուբինեանը այդպիսով նաեւ ուրացաւ իր հօր՝ Կարապետ Ռուբինեանի պայքարը, որ արցախեան շարժման առաջին օրերէն եղած է պայքարին մէջ», ըսաւ Մանուկեան: