Եօթը տարի առաջ, երբ հեռացայ ծննդավայրէս, ենթադրեցի թէ անգամ մըն ալ պիտի չվերադառնամ, կամ երբ վերադառնամ հարազատներս ու բարեկամներս հոն պիտի չգտնեմ:
Եօթը երկա՜ր տարիներ… նոր երկիր, նոր մշակոյթ, դժուար լեզու, տարբեր բարքեր ու սովորութիւններ: Կեանքս զառիվեր կ’ուղղուէր, յոգնելով կանգ կ’առնէի, որ շարունակեմ: Ի վերջոյ բախտը ժպտեցաւ ինծի ու Հալէպ այցելեցի:
Ինծի համար կեանքի մէջ ամէն բան հետեւեալ երեք սահմանումներէն ծնունդ կ’առնէ՝ մտածումներ, զգացումներ ու ցանկութիւններ. եթէ այս երեքը ունենանք, կը հասնինք մեր նպատակին:
Հալէպը շատերու համար պարզ, տափակ, մոխրագոյն ու սահմանափակ ապրուստով յատկանշուող քաղաք մը, վայր մըն է պարզապէս: Անոնք, սակայն, կը սխալին: Հալէպը ծովի նման հանդարտ է երեւութապէս, սակայն իր խորքը մեծ իմաստութիւն կը թաքցնէ: Հալէպը դժուար դպրոց մըն է, որմէ շրջանաւարտ դարձողը ուր ալ դնէք կը ծաղկի: Հալէպը փակ տուփ մըն է, եթէ իմանանք զայն բանալու գաղտնիքը, կ’օժտուինք իմաստունի, դիւանագէտի փորձառութեամբ:
Հալէպը արժէք մըն է. զայն գնահատողները միայն կրնան պարարտանալ իր հարստութեամբ: Հալէպը… Հալէպը… հարազատ, տաքուկ, մտերիմ գիրկն է իրմէ ծնողին:
Եօթը երկար տարիներ ետք, երբ Հալէպ վերադարձայ, ինծի թուեցաւ, թէ երբեք չէի հեռացած անկէ. ձգած տեղէս շարունակեցի անքակտելի կապս վերհիւսել: Տարօրինակ պատկեր՝ նոյն շէնքերը, նոյն դէմքերն ու փողոցները: Սկսայ ամբողջ կարելիութեամբս յափշտակել քաղաքին ջերմութիւնը, զայն կաթիլ առ կաթիլ լեցնելով պարպուած էութեանս մէջ: Հարազատի մը ժպիտը, գրկախառնում մը, գաւաթ մը սուրճի շուրջ զրոյց մը, կարօտով լեցուն թաց աչքերու գգուանքը, գինիի բաժակի հպումները, Սրբոց Քառասնից Մանկանց Մայր եկեղեցւոյ քարերէն տարածուող խունկի բուրմունքը՝ դէպի երկինք բարձրացուցին զիս:
Հալէպէ՛ն հաստատապէս ծնունդ առած է մարդկութիւնը: Հո՛ն, պատերազմին հետեւանքով բազում կորուստներ կան արձանագրուած, սակայն գօտեպնդուելու արուեստը միա՛յն Հալէպի մէջ մնայուն է:
Այո՛, ճիշդ է որ քաղաքը նախապատերազմեան իր փայլքը կորսնցուցած է, առատ ու աժան վառելանիւթ, թաղին մէջ վաճառուող ու մինչեւ տուն մատակարարուող կազի տակառներ, մաքուր ու լուսաւոր փողոցներ, Ճըտէյտէ թաղամասի ու բերդի շրջակայքի շռայլութիւն… չկան այս օրերուն: Հալէպը դարձած է 80-ական թուականներու քաղաքը: Վստա՛հ եմ, սակայն, որ պիտի բարելաւուի ու աւելի շէն դառնայ ան, որովհետեւ հոն կ’ապրին հաստատակամ ու տոկուն մարդիկ:
Հալէպ իր ամբողջ դժուարութիւններով մէկտեղ կը մնայ իր զաւակներուն իտէալական վայրը:
Ծովիկ Կարապետեան