Հովանաւորութեամբ Սուրիոյ մշակոյթի նախարար դոկտ. Լուպանա Մուշաուահի եւ կազմակերպութեամբ Դամասկոսի Տար ալ Ասատ Մշակոյթի եւ Արուեստի տան, 6-9 Սեպտեմբեր 2021-ին, Դամասկոսի Օփերայի տան մէջ տեղի ունեցաւ «Սուրիոյ Երգչախումբերու Համագումար»ի երկրորդ հանդիպումը, մայսթրօ Միսաք Պաղպուտարեանի առաջարկով, որպէս Հալէպ քաղաքի ներկայացուցիչ երգչախումբ՝ իր մասնակցութիւնը բերաւ ՀԵԸ-ի «Սպենդիարեան» երգչախումբը, ղեկավարութեամբ Մարգարիտ Խաչատուրեան-Պանտաքի, դաշնամուրի ընկերակցութեամբ Ռուզան Պարսումեանի։
Առաջին համագումարը տեղի ունեցած էր 2017-ին, երկրի դժուար պայմաններուն մէջ։ Օփերայի տան տնօրէն՝ Անտրէ Մաալուլին շեշտեց, որ այս ծրագիրը պիտի դառնայ աւանդական՝ ծառայելու Սուրիոյ երգչախումբերու կատարողական որակի բարելաւման, միեւնոյն ատեն առիթ ընծայելով երգչախումբերու ծանօթացման եւ համագործակցութեան։
10 երգչախումբեր մասնակցեցան այս համագումարին, որոնք քով – քովի գալով կազմեցին սուրիական երաժշտական գունապնակ, որ կը բաղկանար սուրիանի արուեստը ներկայացնող երգերէ, արաբական սուֆի արուեստէ, Սուրիոյ արեւմտեան շրջանի ծովեզերեան երգերէ, հայկական երգարուեստէ, արաբական ժամանակակից երաժշտութենէ եւ համաշխարհային տեսակաւոր երկիրներ ներկայացնող երգացանկէ։
Ըլլալով մասնակցող երգչախումբերու մէջ ամենահինը, աւելի պարտաւորուած կը զգայինք գոհացնելու երգողները, ունկնդիրները եւ արհեստավարժ խմբավարները, որոնց բոլորին յարգանքը կը վայելէինք։
Համագումարը ունէր հարուստ ծրագիր. գիշերային համերգներու կողքին տեղի ունեցան չորս սեմինարներ՝ հետեւեալ նիւթերով.-
1.«Երգչախմբային Երգեցողութեան Վարպետութիւն», դասախօս՝ մայեսթրա Ղատա Հարպ. ան հաստատեց, որ իւրաքանչիւր երաժշտական ձայնանիշ ունի իր արժէքը, եթէ պիտի չարժեւորենք այդ ձայնանիշը, նախընտրելի է չշարունակել երգեցողութիւնը։
2.«Երգչախմբային Խաղեր». դասախօս՝ Դամասկոսի Օփերայի տան փոխտնօրէն Հուսամ Պրիմօ. մայսթրօն իր յատուկ հիւմորային ոճով կտրեց բոլոր պարիսպները իր եւ երգող ունկնդիրներուն միջեւ։ Ան շեշտեց, որ շատ կարեւոր է երգելէ աւելի վայելել երգեցողութիւնը՝ ուրախ եւ բարձր տրամադրութեամբ։
3.«Երգչախմբային Երգեցողութեան Ոճերը եւ Երգերու Տեսակները». մայսթրօ Պըշըր Իսա, որ մանրամասնօրէն բացատրեց երգչախմբային երգերու եւ անոնց ոճերու զարգացումը դարերու ընթացքին եւ անոնց ազդեցութիւնը ժամանակակից երաժշտութեան վրայ։
4.«Սուրիանի Ժողովրդական Երաժշտութեան Արուեստը». մայսթրօ Շատի Սարուէ, որ ներկայացուց սուրիանի երաժշտութեան պատմութիւնն ու տեսակները եւ անոնց զարգացումը։
«Սպենդիարեան» երգչախումբի ելոյթը տեղի ունեցաւ Չորեքշաբթի, 8 Սեպտեմբեր 2021-ին, երեկոյեան ժամը 7:00-ին, Օփերայի տան տրամաթիքական սրահին մէջ։
Ելոյթը սկսաւ Խաչատուր Աւետիսեանի «Կռունկներ»ով, անոր յաջորդեց Կոմիտասի երգերու փոքր շարան մը, որ գրաւեց ներկաներուն ուշադրութիւնն ու արժանացաւ անոնց գնահատանքին։ «Սարերի Հովին Մեռնեմ» երգին կատարման ընթացքին նստողներուն մէջէն լսուեցաւ թեթեւ նուագակցութիւն մը խումբին հետ: Երգը ծանօթ էր բոլորին, որովհետեւ երգուած էր նոյնիսկ արաբ երգչուհիներու կողմէ։
Երգչախումբին կատարումները այնքան զուսպ եւ գեղեցիկ էին, որ գրաւեցին ներկաներուն սրտերը՝ արժանանալով անոնց ծափողջոյններուն։
Յաջորդ կատարումը եղաւ ալ Ռահպանի եղբայրներու Ֆէյրուզին համար գրուած «Ֆի Ահուէ ալ Մաֆրաք» երգը, զոր յատուկ երգչախումբի համար մշակած էր լիբանանահայ երգահան Եդուարդ Թորիկեանը։
Դահլիճի բարձր տրամադրութիւնը իր գագաթնակէտին հասաւ ճազային «Puttin On The Ritz» երգին կատարման ընթացքին. ներկաները իրենց ծափերով ընկերակցեցան խումբին՝ այս անգամ իրենք բարձրացնելով երգողներու տրամադրութիւնը։
Նախավերջին կատարումը եղաւ Ուսամա Ռահպանիի հայրենասիրական «Սապահ ուլ Խայր» երգը, որուն միջոցաւ երգողները գլխաւորութեամբ մայեսթրա Մարգարիտ Խաչատուրեան-Պանտաքի յարգանքի տուրք մատուցեցին իրենց երկրորդ հայրենիքին՝ Սուրիոյ։ Երգին վերջաբանը այնքան ազդեցիկ էր, որ մշակոյթի նախարար դոկտ. Լուպանա Մուշաուահ արցունքոտ աչքերով յոտնկայս երկար ծափահարեց։
Ելոյթի վերջին ստեղծագործութիւնը կատարելէ առաջ, խմբավարը շնորհակալութիւն յայտնեց այս միջոցառումի հովանաւոր մշակոյթի նախարարին եւ կազմակերպող մարմինին, որոնք առիթ տուին «Սպենդիարեան»ին ունենալ այսպիսի փայլուն համերգ, պատիւ բերելով երգչախումբին եւ իր ներկայացուցած ՀԲԸՄ-ի Հայ Երիտասարդաց Ընկերակցութեան։
Աւելի յարմար երգ չկար քան Կոստանդին Պետրոսեանի «Հայաստան»ը՝ փակելու այս հրաշալի երեկոն։
Ելոյթի աւարտին մշակոյթի նախարարը բեմ բարձրացաւ, խումբի անդամները շնորհաւորեց եւ արտայայտեց իր ուրախութիւնը այսպիսի երգչախումբի մը աւելի քան 65 տարիներու ստեղծարար գոյատեւման համար։ Յատկապէս շնորհաւորեց խումբի ղեկավարն ու անոր դաշնամուրով ընկերակցող օրդ. Ռուզան Պարսումեանը։
Համագումարի վերջին օրը բոլոր երգչախումբերը միասին ելոյթ ունեցան Օփերայի մեծ սրահին մէջ՝ խմբավարութեամբ մայսթրօ Միսաք Պաղպուտարեանի, կատարելով Puccini-ի «Madamme Butterfly» օփերայէն հատուած մը, սուրիանի երգերու շարան մը, ինչպէս նաեւ արաբական ժողովրդական եւ ազգային երգեր։
Համերգի աւարտին բեմին վրայ տեղի ունեցաւ բոլոր մասնակցող երգչախումբերու պարգեւատրում, որուն յաջորդեց համագումարի ընթրիք՝ մասնակցութեամբ մշակոյթի նախարարին։ Ընթրիքի աւարտին «Սպենդիարեան» երգչախումբին կողմէ յատուկ յուշանուէր մը փոխանցուեցաւ համագումարի ընդհանուր պատասխանատու, կազմակերպիչ տնօրէն մայսթրօ Միսաք Պաղպուտարեանին, որուն կը պարտինք մեր մասնակցութիւնն ու յաջողութիւնը։
ՀԵԸ-ի կողմէ յատուկ յուշանուէրներ փոխանցուեցան նաեւ համագումարի միւս երկու կազմակերպիչներուն՝ մայսթրօ Անտրէ Մաալուլիին եւ Հուսամ Պրիմոյին. ինչպէս նաեւ մշակոյթի նախարար դոկտ. Լուպանա Մուշաուահին, որ ջերմապէս ընդունեց նուէրը, խոստանալով գործակցութեան նոր ծրագիրներ մօտիկ ապագային։
Աւելցնենք, որ 7 Սեպտ. 2021-ին «Սպենդիարեան» երգչախումբը իր լրիւ կազմով հիւրընկալուեցաւ Դամասկոսի ՀԲԸՄ-ի «Ն. Եագուպեան» կեդրոնին մէջ, ՀԵԸ-ի Գործադիր Մարմնին կողմէ։ Հանդիպման տիրեց ուրախ մթնոլորտ, հագեցած հաճելի խօսակցութեամբ եւ երգերով։
Հալէպահայը միշտ եղած է աշխատասէր ու բարձրաճակատ։ «Սպենդիարեան» երգչախումբը վերադարձաւ Հալէպ իր հետ բերելով յաղթանակ եւ պարծանք, իր հետ բերելով նաեւ գեղեցիկ յիշատակներ եւ ապագայի նոր ծրագիրներու խանդավառութիւն։
Իր գոյութեան աւելի քան 65 տարիներուն, «Սպենդիարեան» երգչախումբը, անմնացորդ նուիրումով ծառայած է հայ արուեստին՝ երաժշտութեան եւ երգի ճամբով։ Ան դարձած է Հալէպի երգչախմբային գործունէութեան մէջ յատուկ երեւոյթ։ Անոր անդամ – անդամուհիները, խմբավարները, դաշնամուրի ընկերակցողներն ու վարչական պատասխանատուները արժանի են ամէն գնահատանքի։
Բարի երթ «Սպենդիարեան» երգչախումբին։
Գարլոս Պուրճեան
Լուսանկարներ՝ Ղիաս Հապուպի