ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
– Առաջին անգամ ըլլալով Սուրիոյ պասքեթի դաշնութիւնը կազմակերպեց պասքեթի գերազանց բաժակի մրցաշարքը, որուն մասնակցեցան վեց ակումբներ՝ Իթթիհատ, Ճալաա, Ուահտէ, Ճէյշ, Հըթթին եւ Քարամէ: Մրցաշարքի աւարտական մրցումին Հալէպի Իթթիհատը 60-52 արդիւնքով պարտութեան մատնեց Ուահտէն եւ ձեռք ձգեց Սուրիոյ առաջին գերազանց խումբին բաժակը:
– Սուրիոյ լողի հաւաքականի անդամ Ինանա Սուլէյման Ապու Տապիի մէջ տեղի ունեցած լողի արաբ երկիրներու մրցաշարքին գրաւեց առաջին դիրքը եւ արժանացաւ ոսկի մետալի՝ 1500 մեթր լողի մրցումին արձանագրելով 17,52 վայրկեան:
ՄԻՋԱԶԳԱՅԻՆ
ՌԷԱԼ ՄԱՏՐԻՏ ՔԼԱՍԻՔՕՆ ԿՐԿԻՆ ՅԱՂԹԱԿԱՆ ԱՒԱՐՏԵՑ
Կիրակի կէսօրին Սպանիոյ Քամփ Նոյի մարզադաշտին վրայ Ռէալ Մատրիտ անգամ մը եւս կրցաւ յաղթական աւարտել Քլասիքոյի սպասուած հանդիպումը՝ 2-1 արդիւնքով պարտութեան մատնելով Պարսելոնան: Ախոյեանութեան 10-րդ փուլի մրցումը տեղի ունեցաւ մեծաթիւ հանդիսականներու ներկայութեամբ։ 32-րդ վայրկեանին, Տէյվիտ Ալպան ուժեղ հարուածով մը նշանակեց Ռէալի առաջին կոլը: Կիսախաղի մնացեալ վայրկեաններուն Պարսելոնայի խաղացողները այլ առիթներով կրցան հասնիլ մրցակիցին դարպասին, բայց անոնց բոլոր յարձակումները ձախողութեան մատնուեցան: Երկրորդ կիսախաղին Ռէալի խաղացողները տիրապետեցին խաղարկութեան. 90-րդ վայրկեանին Մարքօ Ասենսիօ, օգտուելով պաշտպանողական խաղացողներուն սխալէն, կրկնապատկեց արդիւնքը: Նախքան իրաւարարին սուլիչը, 96-րդ վայրկեանին Ակուիէրօ նշանակեց հիւրընկալ կազմին միակ կոլը, իսկ հանդիպումը իր աւարտին հասաւ 2-1 արդիւնքով:
Աւելցնենք, որ այս մէկը հերթականօրէն չորրորդ անգամն է, որ Ռէալ կը յաջողի պարտութեան մատնել Պարսելոնան:
ՄԱՆՉԵՍԹԸՐ ԻՒՆԱՅԹԸՏ ԾԱՆՐ ՊԱՐՏՈՒԹԻՒՆ ԿՐԵՑ
Անգլիոյ Մանչեսթըր Իւնայթըտը, շարունակելով իր ձախող խաղարկութիւնը, ծանր պարտութիւն մը կրեց այս անգամ Լիվըրփուլէն՝ 5-0 արդիւնքով: Լիվըրփուլի եգիպտացի խաղացող Մուհամմէտ Սալահ Հաթրիք նշանակեց երեք կոլ՝ 38-45 եւ 50-րդ վայրկեաններուն, բարձրացնելով արձանագրած իր կոլերուն թիւը տասի ու գրաւելով կոլ սքորիսթներու առաջին դիրքը: Մրցումի 5-րդ վայրկեանին Նապի Քիթան նշանակեց հանդիպումի առաջին կոլը, որմէ 8 վայրկեան ետք Տիէկօ Կոթան կրկնապատկեց արդիւնքը: 61-րդ վայրկեանին Փօլ Փոկպան կարմիր քարտ ստանալով դուրս եկաւ դաշտէն, իսկ Մանչեսթըրի կազմը հանդիպումը շարունակեց տասը մարզիկով:
Աւելցնենք, որ Չելսի 22 կէտով կը գրաւէ ախոյեանութեան աղիւսակին առաջին դիրքը, իսկ Լիվըրփուլ 21 կէտով՝ երկրորդ դիրքը:
Ռաֆֆի Սիւլահեան