Մէկ տարին սահած էր ահռելի տարուան վրայէն:
Մէկ տարուան ընթացքին շատ բան փոխուած էր:
Մարդիկ գաղթած էին երկրէն, ուրիշներ՝ վերադարձած: Ոմանք հինգ տարիով երիտասարդացած էին, ուրիշներու դէմքին վրայ տարին դարերու հետք թողած էր:
Աշունը այս տարի շատ գեղեցիկ էր: Կ’ըսեն որ նորեկ աշունները նախկին աշուններուն շարունակութիւնն են:
Նոյեմբերի առաջին Կիրակին էր, բայց եղանակը կարծես Սեպտեմբերի վերջալոյսը կը դիմաւորէր: Իսկապէ՛ս: Նախորդ Սեպտեմբերի վերջալոյսին կեանքը կանգ առած էր, գոնէ այստեղ հաւաքուածներուն մեծամասնութեան համար: Կանգնած էին անշշուկ, գլխահակ: Անոնց աչքերը կը բոցկլտային թախծախառն հպարտութեամբ մը, որուն նմանը դեռեւս չէր տեսնուած:
Աշուն մը սահած էր ահռելի աշնան վրայէն…
Անդին զեփիւռը կը շոյէր փարթամ տերեւներով ծառ մը, որ ճարահատ, խեղճի մը նման կանգնած, ոչ մէկ ճիգ կ’ընէր արգիլելու տերեւաթափը:
Տերեւաթափ… կեանքաթափ…:
Ծառէն ոչ շատ հեռու հոգեհանգիստ էր…
Հոգեհանգի՜ստ…
Բայց ինչո՞ւ, ինչպէ՞ս…
Միթէ անոնց հոգիները կրնա՞ն հանգիստ ընել տեսնելով նոր հողատուութիւնը, ազգասպանութիւնը:
Աշունը գեղեցիկ էր այս տարի, բայց կեանքը՝ ոչ:
Հաճելի էր դիտել աշնան տերեւաթափը, սակայն գարուններու կեանքաթափը՝ Ո՛Չ…
Վեհան Պարսումեան