“Հորիզոն”._ՀՅԴ «Արմէն Գարօ» Ուսանողական Միութիւնը յայտարարութիւն տարածած է 25 Դեկտեմբերին Հայաստանի իշխանութիւններուն վարած քաղաքականութեան շուրջ. “13_14 Դեկտեմբերին Թուրքիան եւ Հայաստանը պայմանաւորուած են կարգաւորել դիւանագիտական երկկողմ յարաբերութիւնները։ Այս նոր գործընթացով Հայաստանը, որը թէեւ ընդգծած է առանց նախապայմաններու յարաբերութիւն հաստատել, սակայն անուղղակիօրէն ընդունած է թրքական կողմի պայմանները։ Ակնյայտ է, որ Երեւան հրաժարած է Ցեղասպանութեան ճանաչման գործընթացէն եւ Արցախի հակամարտութիւնը համարած է լուծուած։ Այսպիսով, Հայաստանի կառավարութիւնը նպաստած է իր պետականութեան հիմքերու ոչնչացումին։ Երկու երկիրներն ալ յատուկ բանագնացներ նշանակած են յարաբերութիւններու «կարգաւորման» գործընթացը սկսելու համար։ Այս գործընթացը ուղղակի արդիւնք է 3+3 բանակցային նոր ձեւաչափին, որ խաթարած է բոլոր դիւանագիտական դրոյթները, որոնք երաշխաւորուած են ԵԱՀԿ Մինսքի խումբի հովանաւորութեան տակ։ Թուրքիոյ յատուկ պատուիրակ-բանակցողն է՝ Սերտար Քըլըչը, որ նախապէս եղած է ԱՄՆ-ի դեսպան, ցեղասպանութիւնը ժխտող անձ է եւ «Գորշ գայլեր» ահաբեկչական կազմակերպութեան աջակից: Նման քաղաքական գործիչը չի կրնար Հայաստանի հետ յարաբերութիւններու «կարգաւորման» քննարկումներ վարել։ Նկատի ունենալով, որ նիւ-կայսերական վարչակարգերը կը սպառնան Հայաստանի տարածքային ամբողջականութեան, Նկատի ունենալով Թուրքիոյ Հանրապետութեան յարձակողապաշտ պահուածքը, որ միանշանակ առաջնահերթութիւն կու տայ ուժի կիրառումին, որ ապացուցուած է Նոյեմբեր 2020_էն վեր հայկական տարածք մշտական ներխուժումներով, Նկատի ունենալով, որ հայկական հանրապետութիւններու կենսական շահերը չեն կրնար երաշխաւորուիլ 3+3 ձեւաչափով եւ անոր յաջորդող Թուրքիոյ Հանրապետութեան կողմէն առաջադրուած պայմաններով, ՀՅԴ «Արմէն Գարօ» ուսանողական Միութիւնը. – Կ’ընդգծէ 9 Նոյեմբերի համաձայնագիրի անօրինականութիւնը եւ անոր թելադրած հետագայ մերձեցումը Թուրքիոյ հետ, որ չի կրնար հիմք դառնալ Հարաւային Կովկասի մէջ կայուն եւ տեւական խաղաղութեան հաստատման համար. – Կը պահանջէ վերականգնիլ ԵԱՀԿ Մինսքի խումբի բանակցային ձեւաչափը՝ Ֆրանսայի, Ռուսիոյ եւ ԱՄՆ-ի համանախագահութեան գլխաւորությամբ եւ ընդգծել Արցախի բնիկ ժողովուրդին ինքնորոշման իրաւունքի գերակայութիւնը. – Կը յիշեցնէ Հայաստանի ղեկավարութեան, բոլոր երկկողմ եւ բազմակողմ բանակցութիւններուն, առաջնահերթութիւն տալ Արցախի Հանրապետութեան անվտանգութեան ու կարգավիճակի հարցին. – Կոչ կ’ուղղէ Հայաստանի ղեկավարութեան պաշտպանելու Հայաստանի Հանրապետութեան տարածքային ամբողջականութիւնը, ներառեալ Հայկական պետութեան ողնաշարը համարուող՝ Սիւնիքի մարզը։ – Կը պահանջէ Փաշինեանի վարչակազմի հրաժարականը, որ պատասխանատու է պետութեան կենսական շահերին հակասող քաղաքականութեան վարելուն համար՝ ներառեալ, այսպէս կոչուած, «Զանգեզուրի միջանցքի» բացումը, որն ընդլայնած է նիւ-օսմանեան նկրտումները եւ ոտնահարում է միջազգայնօրէն ճանաչուած Հայաստանի ինքնիշխան տարածքը”։
