Հոգելոյս Տ. Վահան Ծ. Վրդ. Պէրպէրեան, աւազանի անունով Յովսէփ, ծնած է Տէրիք (Սուրիա, Ճազիրէ) 1945 թուականին։ Նախնական կրթութիւնը ստացած է տեղւոյն Ազգային Ազատութիւն Վարժարանին մէջ։ Մեծի Տանն Կիլիկիոյ Կաթողիկոսութեան Դպրեվանք ընդունուած է 1960-ին։ Սարկաւագ ձեռնադրուած է 1964-ին, ապա 4 Յունիս 1967-ին ձեռնադրուած եւ օծուած է կուսակրօն քահանայ՝ վերակոչուելով Տ. ՎԱՀԱՆ ԱԲԵՂԱՅ, իսկ 14 Փետրուար 1971-ին Վարդապետական գաւազանի իշխանութիւն ստացած է՝ ձեռամբ Դպրեվանքի տեսուչ Տ. Գարեգին Եպս. Սարգիսեանի։ Հոգելոյս հայր սուրբը 13 Մայիս 1983-ին Ծայրագոյն Վարդապետութեան իշխանութիւն ստացած է՝ Ս. Աթոռոյս գահակալ Գարեգին Բ. Կաթողիկոսի ձեռամբ։
Հայր Վահան Մայրավանքէն ներս զանազան վանական պաշտօններ ստանձնած է, ինչպէս՝ ուսուցիչ Դպրեվանքի եւ գաւազանակիր։
1973 Սեպտեմբերին հովուական առաքելութեամբ մեկնած է Քարաքաս (Վենեզուելլա), ուր 25 տարի լծուած է իրեն վստահուած հոգեւոր ծառայութեան։
1998-2000 թուականներուն հովուական ծառայութիւնը շարունակած է Հիւսիսային Ամերիկայի Արեւելեան թեմէն ներս։
2000-2006 նշանակուած է Վանքուվըրի (Քանատա) Ս. Գրիգոր Լուսաւորիչ եկեղեցւոյ հոգեւոր հովիւ։
ՆՍՕՏՏ Արամ Ա. Վեհափառ Հայրապետին տնօրինութեամբ եւ օրհնութեամբ 2006-ին իբրեւ առաջնորդի օգնական առաքուած է Բերիոյ հայոց թեմ, իսկ 2017-ին՝ վերադարձած Անթիլիասի Մայրավանք։
«ՅԻՇԱՏԱԿՆ ԱՐԴԱՐՈՑ ՕՐՀՆՈՒԹԵԱՄԲ ԵՂԻՑԻ»