Հայաստանի տարածքին առկայ են անթիւ նախադարեան յուշարձաններ, վանքեր, սակայն ամենախորհրդաւոր, պատմաբաններու եւ գիտնականներու հետաքրքրութիւնը գրաւող կառոյցը Քարահունջն է: Այժմ պատմամշակութային արգելոց եւ պետութեան կողմէ պահպանուող տարածք է: Յայտնի է Քարենիշ կամ Զօրաց քարեր անուններով, պրոնզ-երկաթի դարաշրջանի հսկայ եւ ինքնատիպ մեգալիթեան կառոյցներով (դամբարաններ): Հնավայրը անուանուած է «Զօրաց քարեր», որ կը նշանակէ քարէ զօրք: Ժողովրդական աւանդոյթին  համաձայն, քարերը քարացած զինուորներ են: Քարահունջ բառն ալ ունի հետաքրքրական ստուգաբանութիւն. ան կը նշանակէ «քարերու փունջ» կամ հնչող՝ խօսող քարեր: Կայ ուրիշ կարծիք մըն ալ, որ Քարահունջ անուանումը տրուած է անգլիական Սթոունհենճ հնավայրի նմանութեան պատճառով: Յայտնի են նաեւ այլ անուանումները՝ Ցից քարեր, Դիք-դիք քարեր: