15 Յունիս 2022-ին, Ֆինլանտայի Հանրապետութեան դեսպան Տարժա Ֆերնանտեզ, Սուրիոյ մէջ UNMAS-ի (ՄԱԿ-ի Ականազերծման գործողութիւններու) ղեկավարին՝ տիար Հապիպուլհակ Ջաւէտի ուղեկցութեամբ այցելեց մայրաքաղաք Դամասկոսի Արևմտեան Ղութայի Տարայա շրջան՝ ծանօթանալու Մարդասիրական օժանդակութեան հայկական կեդրոնին կողմէ իրականացուող ականազերծման ծրագիրին:
Այս առիթով, Հայկական Ականազերծման եւ Փորձաքննութեան Ծրագիրի (ACHDE) ղեկավար տիար Արկատի Տոնոյեան անոնց ներկայացուց նախատեսուած աշխատանքներուն ծաւալը և մինչ այժմ իրականացած ձեռքբերումները: Դեկտեմբեր 2021-ին ընթացք առած ականազերծման ծրագրի կիրարկումէն ի վեր, հայկական խումբը ականազերծած ու մաքրած է աւելի քան 382. 000 մեթր քռկս. առաւելաբար գիւղատնտեսական հողատարածք և յայտնաբերած է 265 պայթուցիկ զինամթերք: Հայկական խումբին վերջնական նպատակը այս ծրագիրին միջոցով ընդհանուր առմամբ մէկ միլիոն մեթր քռկս. գիւղատնտեսական հողատարածք ականազերծելն է:
Դեսպանը այցելելով տեղամաս ծանօթացաւ իրականացուող աշխատանքներուն և մաքրման ձեւերուն, ինչպէս նաև փորձեց կիրառել փորձարկման տարածքին մէջ ականներու յայտնաբերման ձեւերէն մէկը:
Տիկին Ֆերնանտեզ զրուցեց տեղացի կարգ մը գիւղացիներու հետ, որոնք շնորհակալութիւն յայտնեցին CHDE-ի անձնակազմին՝ տարածքը մաքրած ըլլալնուն համար, որուն շնորհիւ կարելի պիտի ըլլայ գիւղատնտեսական ու անասնապահական գործունէութիւնը շարունակել այս հողերուն վրայ:
Դեսպանը և UNMAS-ի ղեկավարը բարձր գնահատեցին CHDE-ի արհեստավարժ անձնակազմին կողմէ իրականացուող աշխատանքը: