1 Օգոստոսից Արցախի եւ Ատրպէյճանի միջեւ շփման գծի տարբեր հատուածներում Ատրպէյճանի զինուած ստորաբաժանումները դիմել են սադրիչ զինուորական գործողութիւնների, որի հետեւանքով ունենք զոհեր և վիրաւորներ:
ԱՀ Աժ խմբակցութիւնները Ատրպէյճանի հերթական ոտնձգութիւնները համարում են 2020 թուականի Նոյեմբերին ձեռք բերուած հրադադարի ռեժիմի կոպիտ խախտում, որը նպատակ է հետապնդում շարունակել հայատեացութեան քաղաքականութիւնը եւ խուճապային տրամադրութիւններ ստեղծել Արցախում: Ատրպէյճանը Հայաստանին եւ Ռուսաստանին պարբերաբար մեղադրում է 9 Նոյեմբերի եռակողմ պայմանաւորուածութիւնները չկատարելու մէջ, այն պարագայում, երբ այդ յայտարարութեան գրեթէ որեւէ կէտ չի կատարուել հենց Ատրպէյճանի կողմից:
Այս վարքագիծը մեզ համար նորութիւն չէ։ Ատրպէյճանը մշտապէս վարել է ցեղային զտումների, բռնատեղահանութեան քաղաքականութիւն, հետեւողականոշօրէն խախտելով Արցախի Հանրապետութեան քաղաքացիների կենսական շահերն ու իրաւունքները։ Վերջին օրերի իրադարձութիւնները՝ զոհերի եւ վիրաւորների առկայութիւնը մէկ անգամ եւս փաստում են, որ Ատրպէյճանի կազմում խաղաղ գոյակցութիւնը Արցախի համար բացառուած է։ Խաղաղութիւնը բարձրագոյն արժէք է, սակայն խաղաղութիւն չի լինում ուժի սպառնալիքի տակ, մարդու իրաւունքների ու արժանապատուութեան շարունակական ոտնահարմամբ։
2020 թուականի 44-օրեայ պատերազմի ընթացքում մենք ականատես եղանք միջազգային հանրութեան լռութեանը եւ այդ ժամանակահատուածում Արցախի ժողովրդի դէմ կիրառուած բոլոր յանցագործութիւնները չարժանացան համարժէք դատապարտման, որի պատճառով Ատրպէյճանը շարունակում է ընդլայնել յարձակողական գործողութիւնների մաշտապները։
— Կոչ ենք անում տարբեր երկրների խորհրդարաններին եւ միջազգային բոլոր կազմակերպութիւններին խստօրէն դատապարտել Ատրպէյճանի վերջին գործողութիւնները եւ գործնական քայլեր ձեռնարկել կանխելու համար նոր ոճրագործութիւնները․
— յորդորում ենք ռուս խաղաղապահներին իրականացնել բոլոր անհրաժեշտ գործողութիւնները՝ ապահովելու շփման գծում կայունութեան հաստատումը
Գլուխ խոնարհելով Արցախեան ազատագրական պայքարի բոլոր զոհերի առջեւ՝ մէկ անգամ եւս հաստատում ենք մեր ժողովրդի ազատ եւ անկախ պետութիւն ունենալու իրաւունքը՝ որպէս անվտանգ ու ապահով ապրելու միակ գրաւական։
«Ազատ Հայրենիք – ՔՄԴ»
«Միասնական հայրենիք»
«Արդարութիւն»
«Հայ Յեղափոխական Դաշնակցութիւն»
«Արցախի ժողովրդավարական կուսակցութիւն»
Ստեփանակերտ
04․08․2022թ․