Երկուշաբթի, 22 Օգոստոսին, Պրպէնքի Երիտասարդական կեդրոնին մէջ Արեւմտեան Ամերիկայի Հայ Դատի Յանձնախումբերու ներկայացուցիչները հանդիպեցին հիւրաբար շրջանը գտնուող Թեհրանի Հայ Դատի Յանձնախումբի քարտուղար եւ Թեհրանի Հայոց Թեմի Պատգամաւորական Ժողովի անդամ Շաքէ Աւետեանի հետ:
 
Հանդիպումին կը մասնակցէին Կեդրոնական Կոմիտէի անդամ և «Օրակարգ» պաշտօնաթերթի գլխաւոր խմբագիր Զարեհ Աճէմեան, Կլէնտէյլի Հայ Դատի Յանձնախումբի ատենապետուհի Լուսինէ Տ. Պետրոսեան, Պրպէնքի Հայ Դատի Յանձնախումբի ատենապետ Սագօ Սիմոնեան եւ Պրպէնքի Հայ Դատի Յանձնախումբի անդամ եւ «Նիկոլ Աղբալեան» կոմիտէի փոխատենապետ Արմիկ Աւետիսեանը:
 
Կողմերը իրենց փորձառութիւնները փոխանակեցին Հայ Դատի աշխատանքներու տարբեր ոլորտներու առումով, ինչպէս՝ կազմակերպական, համայնքային, քաղաքական և այլ բնագաւառներու մէջ, նկատի առած, որ իւրաքանչիւր շրջան ունի իր աշխատանքային և կազմակերպական ոճը: Ուշագրաւ էր մեծաթիւ հայրենակիցներու ներգրաւուածութիւնը և աշխատանքի ժողովրդական բնոյթը Թեհրանի Հայ Դատի Յանձնախումբի աշխատանքներուն մէջ, որ կրնայ օրինակ հանդիսանալ արեւմտեան ափի կազմակերպութեան համար: Պարզուեցաւ նաև որ Թեհրանի մէջ ազգային-եկեղեցական և պետական այլ կառոյցներ վերահասու են ԱՄՆ Արեւմտեան շրջանի Հայ Դատի Յանձնախումբի աշխատանքային որոշ ոլորտներուն, որոնք կը վերաբերին համայնքի իրաւունքներու պաշտպանութեան հարցերուն։
 
Հետաքրքրական էին աշխատանքային և կազմակերպական զուգահեռներն ու բաղդատութիւնները:
 
Երկու կողմէն եղան հարցումներ, որոնց տրուեցան համապարփակ պատասխաններ:
 
23 Օգոստոս 2022
Օրակարգ-Պրպէնք