ՀԱԼԷՊԻ ԿԱՒԸ 
Կաւը հողի տեսակ մըն է, որուն գոյնը կը տատանի մոխրագոյնի եւ կարմիրի միջեւ: Ան կ’օգտագործուի մազի զօրացման եւ մաշկային հիւանդութիւններու բուժման համար:
Կաւը բազմատեսակ օգտակարութիւն ունի: Ան կը փափուկցնէ եւ հարթ կը դարձնէ մազը: Կ’օգտագործուի յատկապէս իւղոտ կամ չոր մազ ունեցողներուն համար: Կաւը նաեւ կը փափուկցնէ մաշկը:
Մաշկաբաններ յաճախ կ’օգտագործեն կաւը փոխան դեղորայքի, որպէս  կնճիռներու կանխարգիլման եւ մորթը մաքրելու բնական միջոց:
Կաւին ծննդավայրը Հալէպ նահանգի նշանաւոր գիւղերէն մէկը՝ «Պիլուն»-ը կը համարուի: Հալէպէն քսան մղոն հեռաւորութեան վրայ գտնուող այս գիւղին մէջ կիներ հին ժամանակներէ ի վեր  կաւի՝ պիլունի, առեւտուրով կը զբաղին: Նոյնիսկ տղամարդիկ կ’օգտագործէին կաւը լոգանքի ընթացքին, որպէս գլխու եւ մարմնի մաշկը մաքրող լաւագոյն միջոց:
Պիլունը այն հողն է, որ հարուստ է հանքային աղերով, հանքանիւթերով, կենսանիւթերով, երկաթով, թթուածինով, մակնիզիումով, կրածինով եւ եթերային  իւղերով:
Պիլունէն կազմուած կաւը ամուր քար մըն է՝ որ դիւրաւ կը կոտրուի եւ կը վերածուի փոշիի:
ԿԱՒԻՆ ԱՌԱՒԵԼՈՒԹԻՒՆՆԵՐԸ
-Իւղոտ մաշկն ու մազը կը չորցնէ:
-Կը հարթեցնէ մազը, կը սնուցանէ եւ փայլք կը հաղորդէ անոր:
-Կը պաշտպանէ մազը եւ կը վերացնէ թեփը:
-Կը նպաստէ մաշկի բջիջներու նորոգութեան:
-Կը հեռացնէ մորթին սեւ կէտերը, կնճիռները եւ կը վերացնէ մորթին մահացած բջիջները:
-Դէմքին կը հաղորդէ թարմութիւն եւ փայլք:
-Կը բուժէ նաեւ որովայնի թուլացումը, մաշկի ուռուցքները եւ յօդացաւը:
-Ան կը հեռացնէ բշտիկները եւ անոնց հետքը երկար ժամանակի վրայ:
Հակառակ այս բոլոր առաւելութիւններուն, կաւի օգտագործումը այսօր դարձած է հազուադէպ: Ուստի խորհուրդ կու տանք նոր սերունդին օգտագործելու կաւը՝ մազը եւ գլխու մաշկը առողջ պահելու համար, փոխանակ վնասակար քիմիական սուղ դեղերու կամ քսուկներու:
ԻՆՉՊԷ՞Ս ՕԳՏԱԳՈՐԾԵԼ ԿԱՒԸ
Պիլունի ամուր քարերը  կը դնենք եռացած ջուրին մէջ, տասը վայրկեան վերջ ձեռքով լաւ մը կը հարենք եւ այս լուծոյթը կը քսենք մեր գլխու մաշկին: Քանի մը վայրկեան վերջ, գլուխը կը լուանք գաղջ ջուրով:
Հին ժամանակ կիները բաղնիքներու մէջ նոյն այս կաւին վարդի չոր տերեւներ խառնելով գնդակի կամ օղակի կը վերածէին եւ լոգանքի ատեն իբրեւ օճառ կը գործածէին՝ գլխու մազը մաքրելու համար:
***
ԴԷՄՔԸ ՁՄԵՐՈՒԿՈՎ ՄԱՔՐԵԼՈՒ ԲՆԱԿԱՆ ԲԱՂԱԴՐԱՏՈՄՍԵՐ
Ա, Սէ եւ Պէ6 կենսանիւթերով հարուստ ձմերուկը դէմքը կը պաշտպանէ կանխահաս ծերացումէ, քանի որ ան կը խթանէ քոլլաժենի արտադրութիւնը: Ձմերուկը դիւրին եւ արագ միջոց մըն է դէմքը մաքրելու եւ խոնաւցնելու, մանաւանդ՝ ծովափէն վերադարձին:
Ա) Փոս ամանի մը մէջ ձմերուկի կտոր մը ճզմեցէ՛ք, ապուրի դգալ մը մածուն աւելցուցէ՛ք եւ թանձրուկը տարածեցէ՛ք ձեր դէմքին վրայ: Սպասեցէ՛ք 20 վայրկեան, ապա լուացէ՛ք ձեր երեսը:
Բ) Հարեցէ՛ք 100 կրամ պանանը, աւելցուցէ՛ք 1 ճաշի դգալ ձմերուկի հիւթ։ Այս թանձրուկը նախատեսուած է չոր մաշկի խնամքին համար։
Գ) Քերեցէ՛ք ձմերուկին միջուկը, 2 ժամ վերջ զտեցէ՛ք հիւթը եւ անոր մէջ լուծեցէ՛ք 1 ճ/դ մեղր, 1 թ/դ աղ եւ 200 մլ. օղի։
Մաքրեցէ՛ք դէմքը, ապա քսեցէ՛ք այս թանձրուկը եւ 2 ժամ վերջ լուացէ՛ք դէմքը։
Պատրաստեց՝ Սոնա Տէր Պօղոսեան-Տարաքճեան