Ըստ յիշեալ փրոֆեսորին՝ ԱՄՆ-ին դուր չի գար Էրտողանի վարած ինքնուրոյն քաղաքականութիւնը, ուստի կը փորձէ Թուրքիան կրկին ներառնել քաղաքական իր պարունակին մէջ՝ ընտրութիւններուն ապահովելով իրեն համար աւելի վերահսկելի թեկնածուի մը յաղթանակը:

Յօդուածի հեղինակին պնդումով, Ուաշինկթըն այդ նպատակով կ’իրականացնէ յաջորդական գործողութիւններու հետեւեալ ծրագիրը.

1. Թուրքիոյ հետ հակամարտութեան մէջ մտցնել ԱՄՆ-ի աջակցութիւնը վայելող իր դրացիները:

2. Տնտեսական շրջափակումով արժեզրկել թրքական լիրան եւ նուազեցնել թուրք ժողովուրդին գնողունակութիւնը՝ վատացնելով անոր կենսապայմանները:

3. ԿՀՎ-ի միջոցով արթնցնել կիւլէնական համայնքի քնացած բջիջները եւ սկսիլ թուրք ժողովուրդը հրահրել իշխանութեան դէմ:

4. Ամերիկամէտ քաղաքական կուսակցութիւնները եւ հեղինակութիւնները հաւաքել մէկ յարկի տակ եւ ընդդիմադիր շարժումի մեկնարկը խրախուսել:

5. Ամերիկամէտ եւ ֆինանսապէս շահագրգիռ թերթերու, պատկերասփիւռի եւ այլ լրատուամիջոցներու միջոցով իշխանութիւնները տկարացնող հրապարակումներ ընել:

6. Ստիպել ժողովուրդը ընդվզելու իշխանութեան դէմ եւ քաոս ստեղծել երկրէն ներս:

7. Գործել այնպէս, որ 18 Յունիս 2023-ի նախագահական ընտրութիւններուն ընթացքին նախագահ Էրտողան պարտուի:

Ըստ Աթունի՝ ծրագիրին առաջին քայլը Թուրքիան Յունաստանի հետ հակամարտութեան մէջ մտցնելն էր, որ ուղեկցուեցաւ Յունաստանի մէջ ամերիկեան զօրակազմի տեղակայմամբ ու ռազմական եւ տնտեսական աջակցութեամբ, ինչ որ Աթէնքին աւելի համարձակ դարձուց:

Երկրորդ քայլը արեւելեան Միջերկրականի մէջ հարցեր ստեղծելն ու անոնցմով Թուրքիոյ զինեալ  ցամաքային եւ օդային ու ծովային ուժերը բաժնելն է իրարմէ:

Երրորդ քայլը Քիւրտիստանի Բանուորական Կուսակցութեան եւ

Ժողովուրդի Պաշտպանութեան Ուժերուն ռազմական ու ֆինանսական աջակցութիւն ցուցաբերելով խրախուսելն է անոնց Թուրքիոյ սահմաններուն մօտ գործողութիւններ կատարելը, ինչ որ կը յառաջացնէ Թուրքիոյ ժողովուրդին զայրոյթը:

Չորրորդ քայլն ալ, ըստ Աթունի,  Հայաստան-Ատրպէյճան բախումները սկսիլը կամ Հայաստանի միջոցով Թուրքիոյ դէմ պրոքսի (միջնորդաւորուած-«Գ.») պատերազմ վարելը:

Այսպիսով, ըստ հեղինակին, Թուրքիոյ զինուած ուժերուն համար 4-5 ճակատ պիտի բացուի, որոնց հետեւանքով Թուրքիոյ իրաւապահ ուժերուն համար դժուար պիտի ըլլայ կանխել ներքին յարձակումներն ու սադրանքները:

Այս ամբողջ գործընթացին զուգահեռ ԱՄՆ պիտի փորձէ կարելի եղածին չափ նուազեցնել թրքական լիրայի արժէքն ու հարուածել Թուրքիոյ տնտեսութիւնը:

Թուրք փրոֆեսորին համաձայն, վերոթուարկեալ քայլերուն հետեւանքով ԱՄՆ կը ձգտի յառաջացնել Թուրքիոյ ժողովուրդին զայրոյթը ընդդէմ իշխանութիւններուն եւ 2023-ի Յունիսի ընտրութիւններուն ապահովել իրեն համար «խամաճիկ» թեկնածուի մը ընտրութիւնը նախագահի պաշտօնին:

Աղբիւր՝ Haber7