Ըստ որոշ ուսումնասիրութիւններու, կրծքագեղձի քաղցկեղը աւելի քիչ ընդհանրացած է այն քաղաքներուն մէջ, ուր բնակչութիւնը կը հետեւի կանաչեղէն, պտուղ եւ շատ քիչ քանակով ճարպ պարունակող առողջապահական սննդակարգի:

Գիրութիւնը եւ աւելորդ կշիռքը կ’աւելցնեն կրծքագեղձի քաղցկեղի զարգացման հաւանականութիւնը:

Ըստ 1960-ականներու կատարուած ուսումնասիրութիւններուն, սննդամթերքը առնչուած է քաղցկեղի տարբեր տեսակներու զարգացման հետ:

Սննդականոնի տեսակը եւ ծանրութեան յաւելումը մօտ 30% ազդեցութիւն կրնան ունենալ, ծխելը՝ 30%, ինչպէս նաեւ ոգելից ըմպելիներու յաճախակի օգտագործումը, ֆիզիքական աշխուժութեան բացակայութիւնը, ծինային գործօնները, որոշակի հիւանդութիւնները, բնապահպանական գործօնները (օրինակ՝ ճառագայթման ազդեցութիւնը) եւ այլ անյայտ պատճառներ կրնան դեր ունենալ այս տեսակի քաղցկեղի զարգացման վրայ:

Թէեւ առողջապահական սնունդը (յատկապէս կանաչեղէնի եւ պտուղի օգտագործումը) կը նպաստէ քաղցկեղի (օրինակ՝ հաստ աղիքի քաղցկեղի) զարգացման հաւանականութեան նուազեցման, բայց այս մէկը կարելի չէ վերջնականապէս հաստատել:

Մեր սնունդին մեծ մասը հարկ է ընտրել բուսական աղբիւրներէն: Օրական առնուազն ուտենք հինգ չափաբաժին պտուղ եւ բանջարեղէն (հիմնական ուտեստին հետ եւ որպէս նախուտեստներ): Ընտրենք ամբողջական եւ չմշակուած հացահատիկներ (ինչպէս՝ ֆրիք, ձաւար, վարսակ, սեւ հաց եւ այլն):

Ուտենք ընդեղէն՝ որպէս բուսական սպիտակուցի աղբիւր (օրինակ՝ ոսպ, սիսեռ, լուբիա եւ այլն):

Ընտրենք չյագեցած բուսական իւղեր (ճարպեր), օրինակ ձիթապտուղի ձէթ, ընկոյզ եւ այլն:

Նուազեցնենք ճարպերով հարուստ մթերքներու օգտագործումը, յատկապէս անոնք, որոնք եկած են կենդանական աղբիւրներէն:

Ընտրենք ցաւարեղէն, բանջարեղէն, պտուղ եւ հատիկներ, որովհետեւ անոնք քիչ ճարպեր կը պարունակեն:

Իւղ օգտագործենք չափաւոր ձեւով եւ խուսափինք  ջրածնուած (hydrogenated) ճարպերէն (իւղերէն):

Ճաշը եփելու ձեւին ուշադրութիւն դարձնենք եւ օգտագործենք քիչ քանակով ձէթ ու իւղ:

Տապկոցը փոխարինենք՝ մթերքը եռացնելով կամ խորովելով:

Միսը ընտրելու պահուն, ընտրենք քիչ ճարպեր պարունակող կտորներ եւ հաւու միսի պարագային միսը մորթէն ձերբազատենք:

Նախընտրելի է կարմիր միսը օգտագործել չափաւոր ձեւով եւ կեդրոնանալ ձուկի ու հաւի օգտագործման վրայ:

Հեռու մնանք վերամշակուած միսերէն:

Թափ տալ ֆիզիքական աշխուժութեան եւ  մեր ծանրութիւնը չափի մէջ պահենք: Նախընտրելի է օրական առնուազն 30 վայրկեան մարզանք ընել, որովհետեւ մարզանքը եւ մարմնի շարժումը կը նուազեցնեն որոշ տեսակի քաղցկեղներու զարգացման հաւանականութիւնը, կը կարգաւորեն հորմոնները եւ կ’աւելցնեն աղիքներու շարժումը:

Նուազեցնենք ոգելից ըմպելիներու սպառումը եւ թեթեւցնենք ծխելը: Որոշ ուսումնասիրութիւններ ցոյց կու տան, թէ ոգելից ըմպելին կ’աւելցնէ կրծքագեղձի քաղցկեղի զարգացման հաւանականութիւնը: