«Արմէնփրէս»._Ամերիկայի Հայ Դատի Յանձնախումբի յայտարարութեան մէջ, որ ներկայացուած է 16 Նոյեմբերին տեղի ունենալիք տարածաշրջանի մասին ԱՄՆ Ծերակոյտի արտաքին յարաբերութիւններու հարցերով յանձնաժողովի լսումներուն համար յայտնուած է, որ
ԱՄՆ քաղաքականութիւնը Կովկասի նկատմամբ պէտք է ամրապնդէ Հայաստանի եւ Արցախի անվտանգութիւնը Ատրպէյճանի եւ Թուրքիոյ սպառնալիքներէն:
«ԱՄՆ-ի քաղաքականութիւնը Հայաստանի նկատմամբ պէտք է համահունչ ըլլայ Հայաստանի եւ Արցախի անվտանգութեան ու կենսունակութեան` տարածաշրջանի մէջ առկայ գոյութենաբանական սպառնալիքներու պայմաններուն տալ: Միեւնոյն ատեն ԱՄՆ-ի քաղաքականութիւնը Ատրպէյճանի նկատմամբ պէտք է առաջնահերթութիւն տայ այդ երկրի հաշուետուողականութեան անցեալ եւ շարունակուող յանցագործութիւններուն համար: Կովկասի մէջ ԱՄՆ-ի ներկայիս, խորապէս թերի քաղաքականութիւնը ժողովրդավարական Հայաստանին դասախօսութիւններ կ’առաջարկէ ժողովրդավարութեան մասին, ԱՄՆ հարկատուներու կողմէն ֆինանսաւորուող զինուորական օգնութիւն ուղարկած է բռնատիրական Ատրպէյճանին եւ բոլորովին օգնութիւն չէ ցուցաբերած վտանգի տակ գտնուող Արցախին: Ատիկա պէտք է փոխուի», նշուած է Ամերիկայի Հայ Դատի յանձնախումբի յայտարարութեան մէջ, որ ներկայացուած է կառավարական գործերու տնօրէն Թերեզա Երիմեանի կողմէն:
Յայտարարութիւնը կ’անդրադառնայ յանձնախումբի շարք մը առաջնահերթութիւններուն՝
Ատրպէյճանին ԱՄՆ-ի օգնութեան մասին 907-րդ յօդուածի սահմանափակումներու ամբողջական կիրարկում,
Արցախին 50 միլիոն ԱՄՆ տոլարէն ոչ պակաս ուղղակի մարդասիրական օգնութեան տրամադրում,
պաշտօնական հետաքննութիւն թրքական անօդաչու թռչող սարքերու հետ առնչուած զէնքի արտահանման խախտումներու շուրջ,
Ատրպէյճանի կողմէն զինուորական յանցագործութիւններու հետաքննութիւն՝ ներառյալ արգիլուած զինամթերքի օգտագործումը, օտարերկրեայ վարձկաններու հաւաքագրումը, մշակութային եւ կրօնական յուշարձաններու պղծումները, ինչպէս նաեւ՝ հայ ռազմագերիներու անօրինական պահումը, անոնց նկատմամբ բռնութիւնը եւ անոնց սպանութիւնը եւ այլն:
ԱՄՆ Ծերակոյտի արտաքին յարաբերութիւններու հարցերու յանձնաժողովի լսումները տեղի կ’ունենան Չորեքշաբթի՝16 Նոյեմբերին: Բանախօսներու շարքին են ԱՄՆ պետական քարտուղարի եւրոպական եւ եւրասիական հարցերու տեղակալ Քերեն Տոնֆրիտ եւ ԱՄՆ պետական քարտուղարութեան Կովկասեան բանակցութիւններու հարցերու աւագ խորհրդական Ֆիլիպ Ռիքըր: