31 Դեկտեմբերի գիշերը սեղանը թելադրելի է յարդարել գունաւոր պնակներով, իսկ մասնագէտներ կ’առաջարկեն երկու հիմնական ուղղութիւններ.

-Առաջինը՝ դասական ոսկեգոյն- կարմիր գոյներու համակարգն է՝ կանաչի լրացումներով:

-Երկրորդ ծանօթ տարբերակը՝ կապոյտի, բաց կապոյտի եւ սպիտակի համադրութիւնն է, անշուշտ արծաթագոյն փայլքի երանգներով՝ առ ի յիշեցում Նոր Տարուան գիշերուան տօնական մթնոլորտին:

Այդ կապոյտն ու բաց կապոյտը կը համապատասխանեն ջրային նապաստակի գոյնին,  որ այս տարուան խորհրդանիշն է:

Ամանորին պէտք է նախապատրաստուիլ լաւ տրամադրութեամբ, շրջանցել դժուարութիւններն ու լաւատեսութեամբ լեցուիլ, ամենակարեւորը համախմբուիլ հարազատներու եւ սիրելիներու հետ: Ամանորին հարկ է ըլլալ ներողամիտ, մոռնալ վէճերն ու քինախնդիր չըլլալ:

Ձեր ընտանիքի անդամներուն հետ միասին կազմակերպեցէ՛ք տօնի նախապատրաստական աշխատանքները. սա կը նպաստէ ընտանիքի անդամներուն մերձեցման եւ ուրախ մթնոլորտի նախապատրաստման: Մեծ գումար մսխելը պայման չէ գեղեցկութիւն եւ ջերմութիւն բերելու ձեր տան: Օգտագործեցէ՛ք պարզ զարդեր, սեղանը յարդարեցէ՛ք ձեռային աշխատանքով, ձեր հագուստները թող ըլլան պարզ ու գեղեցիկ: Ձեր ժպիտն ու սէրը գեղեցկագոյն ձեւով պիտի զարդարեն ձեր բնակարանը:

2023-ը, ըստ աստղագուշակներու, աւելի հանգիստ ու երջանկաբեր տարի մը ըլլալ կը թուի:

Նապաստակի տարին չորրորդն է չինական կենդանակերպի 12-ամեայ շրջագիծին մէջ եւ կը համարուի ամենաերջանիկը արեւելեան օրացոյցին մէջ:

Ճագարը յաջողութիւն կը բերէ  նաեւ բնակարանային հարցերու լուծման: Տարին բարենպաստ է ճամբորդութիւններու համար: Ճագարը շարժուն կենդանի է, ուստի աշխատանքի նոր առիթներ ու կարելիութիւններ կրնայ ստեղծուիլ աշխատասէր ու հնարամիտ մարդոց համար:

Եղէ՛ք լաւատես, մաքրեցէ՛ք ձեր հոգին, պայծառ դարձուցէ՛ք ձեր միտքը ու պիտի տեսնէք, թէ տարին ինչպէ՛ս պիտի ժպտի ձեզի:

———————————–