Շարունակուող լիակատար շրջափակման եւ ձմրան պայմաններում ելեկտրական ուժանիւթի, համացանցի, իսկ 2023-ի Յունուարի 17-ից նաեւ կազի մատակարարման հերթական խափանումները Արցախի Հանրապետութեան ազգաբնակչութեանը կանգնեցնում են մարդկային աղէտի եզրին։ Դրան գումարուել է նաեւ Յունուարի 17-ի լոյս 18-ի գիշերը խաղաղապահների ուղեկցութեամբ Գորիսից Ստեփանակերտ վերադարձող 19 երեխաների նկատմամբ «բնապահպանման աշխատակիցներ»-ի ահաբեկչական գործողութիւնները, եւ այդ ամէնը ատրպէյճանական մամուլում ու հասարակական ցանցերում տարածելը:

Արցախի Հանրապետութեան ազգաբնակչութեան նկատմամբ Ատրպէյճանի իշխանութիւնների կողմից շարունակուող սողացող պատերազմը տեղի է ունենում աշխարհի՝ գրեթէ լուռ համաձայնութեամբ: Այն նպատակ ունի կոտրել արցախահայութեան կամքը ՝ տասնեակ հազարաւոր մարդկանց ցեղային զտումների միջոցով բռնատեղահանել իրենց պատմական հայրենիքից։ Նմանօրինակ քայլերով Ատրպէյճանը փորձում է նաեւ ձախողել տարածաշրջանում պատերազմի օջախների մարմանն ու հակամարտութիւնների կարգաւորմանն ուղղուած միջազգային կառոյցների ՝ տարբեր երկրների ջանքերը։

2020-ի Նոյեմբերի 9-ի յայտարարութեան կողմեր հանդիսացող Հայաստանի Հանրապետութեանը ՝ Ռուսաստանի Դաշնութեանը կոչ ենք անում հրատապ միջոցներ ձեռնարկելու Արցախը ապաշրջափակելու ՝ մարդկային աղէտը կանխելու համար:

Յորդորում ենք միջազգային կառոյցներին եւ ՄԱԿ-ի անդամ երկրներին յայտարարութիւններից եւ կոչերից զատ գործնական քայլերով կանխել Ատրպէյճանի ցեղասպանական գործողութիւնները:

Արցախի Հանրապետութեան առջեւ ծառացած մարտահրաւէրները արժանապատուութեամբ յաղթահարելու նպատակով դիմում ենք համայն հայութեանը՝ համապատասխան քայլեր ձեռնարկելու սանձելու Ատրպէյճանի յարձակողական գործողութիւնները ՝ պաշտպանելու սեփական հողում ապրելու արցախահայութեան օրինական իրաւունքը։