«Որպէսզի Հայաստանը հանգիստ ապրի 29 հազար քառակուսի քիլոմեթր տարածքին մէջ` կայ մէկ պայման. անոնք պէտք է ընդունին մեր պայմանները` պաշտօնապէս Ղարաբաղը ճանչնան Ատրպէյճանի մաս, մեր պայմաններուն հիմամբ կատարեն սահմանազատումի աշխատանքները», Շաբաթ օր ըսած է Ատրպէյճանի նախագահ Իլհամ Ալիեւ` աւելցնելով, որ միայն այս պարագային հայերը կրնան հանգիստ ապրիլ 29 հազար քառակուսի քիլոմեթր տարածքին մէջ, ինչպէս արդէն ատիկա կը ցանկան: Այս մասին հաղորդեց «Ազատութիւն» ձայնասփիւռի կայանը:
Անոր համաձայն, ատրպէյճանական տարածքներու 30 տարուան բռնագրաւումի, պատերազմի, յետպատերազմեան իրողութիւնները պէտք է գտնեն եւ պիտի գտնեն իրենց արտացոլումը խաղաղութեան բանակցութիւններուն մէջ:
«Հակառակ պարագային ոչ մէկ խաղաղութեան համաձայնութիւն պիտի ըլլայ», յայտարարած է Ալիեւ` Արցախի Հանրապետութեան բռնագրաւեալ Թալիշ գիւղին մէջ: