Սուրիոյ նախագահ Պաշշար ալ-Ասատ Թեհրան այցելեց, ցաւակցութիւն յայտնելու Իրանի Իսլամական Յեղափոխութեան ղեկավար Ալի Խամինաիին եւ Իրանի ժողովուրդին՝ Իրանի հանգուցեալ նախագահ Իպրահիմ Ռայիսիի, Իրանի ԱԳ նախարար Հուսէյն Էմիր Ապտուլլահեանի եւ իրենց ընկերակիցներուն մահուան առիթով։

Նախագահ Ասատ շեշտեց, որ Նախագահ Ռայիսի մտքով եւ էութեամբ Իրանի ժողովուրդին շահը կը մտածէր ու իր սրտին մէջ յատուկ տեղ կը գրաւէին Սուրիան եւ Սուրիոյ ժողովուրդը։

Նախագահ Ասատ ըսաւ. «Իրանի հանգուցեալ արտաքին գործոց նախարար Հուսէյն Էմիր Ապտուլլահեան Իրանի եւ Սուրիոյ ռազմավարական աշխոյժ գործակցութիւնը կը ղեկավարէր։ Ան կարեւոր դեր ունէր տարածաշրջանին մէջ խաղաղութեան հաստատման գծով»։

Նախագահը շեշտեց, որ այս ցաւալի դէպքը Իրանը իր ուղիէն պիտի չշեղէ. Իրան պիտի շարունակէ Դիմադրութեան եւ Պաղեստինի ժողովուրդին նեցուկ կանգնիլ, աւելցնելով, որ Սուրիոյ եւ Իրանի յարաբերութիւնը ամրակուռ է, կայուն եւ կը ծառայէ երկու երկիրներու շահերուն եւ ամբողջ տարածաշրջանի խաղաղութեան։

Իր կարգին Խամինաաի շնորհակալութիւն յայտնեց նախագահ Ասատին ցաւակցական այցելութեան համար ըսելով. «Հանգուցեալ նախագահը ինչպէս նաեւ հանգուցեալ նախարար Ապտըլլահեանը կարեւոր դեր ունէին Թեհրանի եւ Դամասկոսի յարաբերութեան ամրապնդման մէջ»։