Ընկերութեան մէջ ապրող անհատը հարկադրուած է բազմազան յարաբերութիւններ մշակելու իր նմաններուն, ազգին եւ պետութեան հետ:

Այդ յարաբերութիւնները հաճելի դարձնելու եւ անոնցմէ նիւթական եւ բարոյական առաւելագոյն օգուտը քաղելու համար, ամէն մարդ պարտաւոր է յարգել կարգ մը էական կանոններ,  որոնց ամբողջութիւնը կը կոչուի Կենցաղագիտութիւն:

Իսկ Անհատական Կենցաղագիտութիւնը ամբողջութիւնն է այն քաղաքավարական կանոններուն, որոնք կը վերաբերին մեր նիստ ու կացին, արդուզարդին եւ այլն:

Արդուզարդի խնամք տանիլը աւելորդ պերճանք չէ, այլ անհրաժեշտութիւն մը ամէն բարեկիրթ մարդու համար:

Պատշաճ արդուզարդ ունենալու համար պայման չէ վայելչաձեւ ըլլալ:

Վայելչաձեւութիւնը յատկութիւն մըն է, զոր բնութիւնը տուած կ’ըլլայ մեզի. անիկա ստացական չէ: Բաւարար է կարգ մը բաներու ուշադրութիւն դարձնել՝ վայելուչ արտաքին մը ունենալու համար:

Ջանացէ՛ք, որ ձեր հագուստները միշտ մաքուր ըլլան, կօշիկները՝ ներկուած:

Եղունգները շատ մի՛ երկնցնէք եւ եթէ երկար են, ջանացէ՛ք որ անոնց ներքին պատեանը սեւցած չըլլայ:

Ճաշի պահուն ձեր բերանը գոց պահեցէ՛ք եւ անաղմուկ ծամեցէ՛ք: Պատառը ձեր բերնին մէջ եղած ատեն ջուր մի՛ խմէք:

Ապուրին վրայ մի՛ փչէք զայն պաղեցնելու  դիտումով: Դանակը ձեր բերանը մի՛ տանիք: Հիւրընկալուելու պարագային ջանացէ՛ք պնակին մէջ կերակուր չաւելցնել:

Փողոցը, փոյթ տարէ՛ք որ ձեր բաճկոնին կոճակները խնամքով  կոճկուած ըլլան: Քալելու պահուն ձեր թեւերը կախած ասդին-անդին մի՛ շարժէք: Մշտապէս մայթին աջ կողմէն քալեցէ՛ք։

Մայթին վրայ խօսակցութեան մի՛ տարուիք ծանօթներու հետ:

Մէկ մայթէն միւսը կամ հեռուէն զիրար մի՛ կանչէք:

Թատրոնը, նուագահանդէսը, լսարանը այն վայրերն են, ուր դիւրաւ կը զանազանուի բարեկիրթ, կենցաղագէտ մարդը անկիրթ, կոշտ մարդէն:

Ասոր համար է որ անհատը եւ մանաւանդ երիտասարդը յատկապէս ուշադիր ըլլալու է իր նիստ ու կացին, այսպիսի վայրերու մէջ:

Փափաքելի է, որ  ներկայացումը չսկսած սրահ մտնել:

Բանախօսը կամ դերասանը իր պարբերութիւնը չաւարտած կամ երգիչը իր երգը չլմնցուցած մի՛ ծափահարէք:

Ծափահարելու ատեն, լայնօրէն մի՛ շարժէք  ձեր բազուկները:

Ջանացէ՛ք ներկայացման ընթացքին չզրուցել ձեր կողքի մարդոց հետ :

Եթէ հաւաքոյթին կազմակերպիչը դուք էք, ջանացէ՛ք որ բացումը կատարուի յայտագիրին մէջ ճշդուած ժամուն:

Յարգեցէ՛ք սրահին մէջ չծխելու պատուէրը:

Լալկան մանուկները ձեզի հետ սրահ մի՛ բերէք: