9 Յունիսին, Երեւանի Հանրապետութեան հրապարակին վրայ սկսաւ «Տաւուշը Յանուն Հայրենիքի» շարժումի առաջնորդ Բագրատ Սրբազանի հրաւիրած համազգային հանրահաւաքը։
Մինչեւ հանրահաւաքին սկսիլը երիտասարդները Սասունցի Դաւիթ կայարանի, Հրազդան մարզադաշտի եւ Մատենադարանի յարակից տարածքներէն երթով միացան հրապարակին վրայ հաւաքուած բազմահազար քաղաքացիներուն:
Հանրահաւաքը սկսաւ ՀՀ օրհներգով եւ Տէրունական աղօթքով:
Մեծ պաստառի վրայ ցուցադրուեցաւ ոստիկանական վայրագութիւնները յիշեցնող տեսանիւթ:

«Այս շրջանին իշխանութիւնները բազմաթիւ միջոցներով ճնշած են մարդոց, ինչ որ դրսեւորուած է մատ թափ տալէն սկսեալ մինչեւ կալանաւորում: Ունինք քաղաքական բանտարկեալներ, որոնք երկար ժամանակ է նստած են», իր ելոյթին ընթացքին յայտարարեց փաստաբան Ռուբէն Մելիքեան։

Անդրադառնալով Արտաքին Գործոց Նախարարութեան շէնքին դիմաց ոստիկաններու կողմէ քաղաքացիներու նկատմամբ բիրտ ուժի գործադրումին, փաստաբանը ըսաւ․ «Քանի տակաւին ոչ մէկ ոստիկան կանչուած է պատասխանատուութեան, քաղաքացիներուն նկատմամբ որեւէ գործողութիւն՝ ձերբակալում եւ կալանաւորում ապօրինի է, քանի որ երկակի մօտեցում կը կիրառուի»։
«Հինգ իրաւապաշտպաններու անունով կ’ուզենք կարմիր բերետ նուիրել ՄԻՊ-ին, որովհետեւ ան հիանալիօրէն կը պաշտպանէ կարմիր բերետաւորներու իրաւունքը», ըսաւ Ռուբէն Մելիքեան՝ աւելցնելով, որ վաղը անիկա անպայման կ՚առաքուի Անահիտ Մանասեանին։

«Իմաստ չունի իմ սորվիլը, եթէ յետոյ պէտք է դառնամ թուրքի կիրթ ստրուկ: Մենք՝ ուսանողներս, կը գիտակցինք աւելին, քան կը թուի շատերուն։ Վերջին հինգ տարիներուն մենք շատ բան հասկցանք։ Յաճախ դժուար էր կոշմնորոշուիլ, փողոց դուրս գալ, մտնել պայքարի մէջ, բայց այսօր մեզի այլ ճանապարհ չեն ձգած։ Մենք յաղթանակի սերունդ ենք եւ մեր յաղթանակը պէտք է շարունակական ըլլայ։ Մենք համաձայն չենք ապրելու պարտուողի հոգեբանութեամբ։ Ես այստեղ եմ, որ ունենամ ամուր պետութիւն, որպէսզի կառուցեմ իմ ապագան արժանապատիւ երկրի մէջ, ստիպուած չըլլամ արտագաղթել այլ երկիր», իր խօսքին մէջ ըսաւ ԵՊՀ ուսանող Արման Սարգսեան, որ պայքարի օրերուն տուժած է նաեւ ոստիկաններու բռնի գործողութիւններէն։

Հանրահաւաքի ժամանակ ցուցադրուեցաւ տեսանիւթ այն մասին, թէ ինչ կը նշանակէ «Սրբազան պայքար»-ի տարբերանշանը:

Թրքագէտ Վարուժան Գեղամեան իր ելոյթին մէջ նշեց. «Մէկ ամիս է, որ Թուրքիոյ եւ Ատրպէյճանի մէջ ուշադիր կը հետեւին Հայաստանի մէջ տեղի ունեցող գործընթացներուն։ Ձեր պայքարին կը հետեւին անհանգստացած, որ յանկարծ այստեղ փոփոխութիւն չըլլայ։
Բացի անկէ, ձեր սկսած պայքարին պատճառով Թուրքիոյ մէջ կը հրաւիրեն անվտանգութեան խորհուրդի նիստ, որովհետեւ Հայաստանի մէջ իշխանափոխութիւնը ձեռնտու չէ իրենց շահերուն», ըսաւ Գեղամեան՝ աւելցնելով, որ իրենք կ’անհանգստանան, որովհետեւ գիտեն, որ բոլորիս պայքարը պիտի բերէ ոչ թէ թրքական, այլ՝ հայկական խաղաղութիւն։

Բագրատ արքեպիսկոպոս Գալստանեան յայտարարեց. «Կեղծ են բոլոր թէզերը այն մասին, որ այսօր պատերազմ գոյութիւն չունի, եւ իբրեւ թէ մենք պիտի նպաստենք անոր վերսկսումին։
Սա ամենամեծ կեղծիքն է, քանի որ պատերազմ բերած իշխանութիւնը չի կրնար պատերազմ աւարտել։ Լաւագոյն պարագային անիկա մեզի կը տանի ամբողջական ինքնայանձնումի, մեր հայրենիքի, պետութեան եւ ինքնութեան կորուստով։ Պատերազմը չէ աւարտած։
Անիկա կը շարունակուի այս յանցաւոր սահմանազատման եւ սահմանագծման տեսքով»։
«Անցումային կառավարութիւնը կը պատրաստուի արտահերթ ընտրութիւններու` առանց անոր մասնակցելու», յայտարարեց Բագրատ Սրբազանը։
Ան նշեց, որ անցումային կառավարութիւնը օրակարգային երեք ուղղութիւններով պիտի աշխատի.
«ա) Հաշտութեան կառավարութիւն վերկուսակցական՝ կազմուած բոլոր ունակներէն՝ իրենց մասնագիտական վաստակով, գիտելիքներով եւ նուիրումով։ Ներքին հաշտութեան՝ արդարութեան սկզբունքի վրայ։
բ) Արտաքին յարաբերութիւններ՝ իրական խաղաղութեան, առանց հականերու, հայկական օրակարգով։
գ) Սահմանուած ժամկէտով արտահերթ կամ հերթական ընտրութիւններու նախապատրաստում եւ կատարում՝ առանց հաւակնութիւն ունենալու մասնակցելու այդ ընտրութիւններուն՝ ազատ ու թափանցիկ միջավայր եւ մեկնարկային արդարութիւն ապահովելով բոլոր քաղաքական ուժերուն համար»։
Բագրատ Սրբազան յայտարարեց շարժումին յառաջիկայ օրերուն ընելիքները եւ պահանջները։
«Կը դիմեմ Ազգային Ժողովի բոլոր խմբակցութիւններուն․
Քայլ 1. Մեր պահանջով Ազգային Ժողովի ընդդիմադիր պատգամաւորները կը նախաձեռնեն խորհրդարանի արտահերթ նիստի 11 Յունիսին` ժամը 18։30-ին, կառավարութեան հրաժարականի և նոր կառավարութիւն ձեւաւորելու օրակարգով։
Քայլ 2. 10 Յունիսին Ազգային Ժողովի խորհուրդը ժողովուրդին որոշումով պարտաւոր է ընդունիլ որոշում արտահերթ նիստ հրաւիրելու մասին, քաղաքական մեծամասնութիւնը՝ ՔՊ-ական պատգամաւորները, պարտաւոր են ենթարկուիլ ժողովուրդի կամքին, գործել անձնական խիղճով եւ համոզմունքով։ Մեր ներկայութեամբ մենք անոնց թոյլ չենք տար հերթական հակապետական սխալ գործել։
Քայլ 3. Համաժողովրդական պահանջին հիման վրայ խորհրդարանը իր արտահերթ նիստով հաւանութիւն պիտի տայ գործող կառավարութեան հրաժարականի եւ նոր կառավարութիւն ձևաւորելու որոշումին»։
«Խաղալու ժամ չէ, պէտք է գործել», յայտարարեց սրբազանը:
Հանրահաւաքի աւարտին Հանրապետութեան հրապարակէն սկսաւ երթ՝ Ամիրեան, Մաշտոց եւ Բաղրամեան փողոցներէն: