-Սուրիոյ Ողիմպիական պատուիրակութիւնը ժամանեց Փարիզ՝ մասնակցութիւն բերելու Փարիզ 2024-ի Ողիմպիական մրցումներուն: Սուրիա իր մասնակցութիւնը պիտի բերէ ծանրամարտի, ձիարշաւի, լողի, ճիտոյի  եւ աթլէթի մարզաձեւերուն։ Պատուիրակութեան պատասխանատուն է Սուրիոյ Մարզական Գերագոյն Դաշնութեան փոխնախագահ Ալաա Ճոխաճին:

-Անցեալ շաբթուան ընթացքին, Սուրիոյ Պասքեթի Դաշնութիւնը գումարեց խորհրդաժողով մը, ուր քննարկուեցաւ նախորդ տարեշրջանի գործընթացը, ինչպէս նաեւ ներկայացուեցան առաջարկներ, որոնք պիտի վաւերացուին ընդհանուր ժողովի ընթացքին:

Ուրբաթ 26 Յուլիսին, Փարիզի մէջ տեղի ունեցաւ Ողիմպիական 2024-ի ամառնային մրցումներու բացման արարողութիւնը, որ առաջին անգամ ըլլալով կայացաւ ֆութպոլի դաշտէ դուրս, Փարիզի նշանաւոր Սէն գետին շուրջ: Արարողութիւնը սկսաւ տեսերիզով մը, ուր Զենատտին Զիտան, որ բարձրացուցած էր համաշխարհային ֆութպոլի 1998 ախոյեանութեան բաժակը, Ողիմպիականի ջահը բարձրացուցած կը շրջէր Փարիզի պողոտաները: Բացման արարողութեան ներկայ էին 6800 մարզիկներ, որոնք ժամանած էին 205 երկիրներէ: Առաջին երկիրը, որ մուտք գործեց Յունաստանն էր, իրեն յաջորդեցին մնացեալ բոլոր  երկիրները, որոնք նաւակներով Սէն գետին վրայ ներկայացան 320 հազար հանդիսատեսի, բարձրացնելով իրենց երկիրներու դրօշները:

Ռէալ Մատրիտի Սանթիակո Պերնապէյի մարզադաշտին վրայ տեղի ունեցաւ Արքայական ակումբի նորեկ, Պրազիլի հաւաքականի 18-ամեայ յարձակող Էնտրիքի շնորհանդէսը: Ֆութպոլիստը պրազիլական Բալմերասի ակումբէն տեղափոխուեցաւ Սպանիա՝ Ռէալին հետ կնքելով 6 տարուան պայմանագրութիւն։ Ան հանդէս պիտի գայ 16 թիւը կրող խաղաշապիկով։ Բալմերասի գլխաւոր խումբին հետ  Էնտրիք մասնակցած է 80 մրցումի, նշանակած է 21 կոլ եւ կատարած՝ 4 կոլային փոխանցում։ Transfermarket-ը Էնտրիքի փոխադրութեան արժէքը սահմանած է 60 միլիոն եւրոյով:

Սպանական Mirror-ը յայտնեց, որ Լոնտոնի Արսենալ խումբը կը փորձէ ձեռք բերել Պարսելոնայի 27-ամեայ պրազիլցի  յարձակող Ռաֆինիան: Պարսելոնան տեղափոխութեան համար պահանջած է 50 միլիոն եւրո։

Ռաֆինիա 2022 թուականէն ի վեր  հանդէս կու գայ քաթալոնէական ակումբին հետ:  Սպանիոյ անցած առաջնութեան ան մասնակցած է 28 մրցումի եւ  նշանակած է 6 կոլ՝ կատարելով 9 կոլային փոխանցում։ Ռաֆինիայի պայմանագիրը  Պարսելոնայի հետ նախատեսուած էր մինչեւ 2027: