ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
-Սուրիոյ պասքեթի աղջկանց հաւաքականի խաղացող Ալիսիա Մակարեան մէկ տարուան պայմանագրութեամբ միացաւ Դամասկոսի Ուահտէի կազմին: Յիշեցնենք, որ Ալիսիա իր պասքեթի կեանքը սկսած է ՀՄԸՄ-ի կազմին հետ, որմէ ետք մաս կազմած է Դամասկոսի Ուահտէ, Սաուրա եւ Հըթթին խումբերուն:
-Դամասկոսի Ուահտէի պասքեթի աղջկանց խումբը մեկնեցաւ Յորդանան, ուր մասնակցութիւն պիտի բերէ արաբ երկիրներու պասքեթի աղջկանց մրցաշարքին: Առաջին հանդիպումին, Սուրիոյ ներկայացուցիչը 53-74 արդիւնքով պարտութեան մատնուեցաւ Քուէյթի ալ-Ֆաթաթ խումբէն:
ՄԻՋԱԶԳԱՅԻՆ
ՌԷԱԼ ՄՏԱԴԻՐ Է ԵՐԿԱՐԱՁԳԵԼ ՔԱՐՊԱՀԱԼԻ ՊԱՅՄԱՆԱԳՐՈՒԹԻՒՆԸ
Ըստ Marca-ի, Սպանիոյ ախոյեան եւ Չեմփիընզ Լիկի գաւաթակիր Ռէալ Մատրիտ մտադիր է մէկ տարի եւս երկարաձգել գործակցութիւնը 32-ամեայ սպանացի աջ պաշտպան Տանի Քարպահալի հետ: Անոր գործող պայմանագրութիւնը նախատեսուած է մինչեւ այս մրցաշրջանի աւարտը: Տանի Քարպահալ դէմ չէ կարճ ժամանակամիջոցով երկարաձգելու իր պայմանագրութիւնը եւ ընդունելու ակումբի առաջարկը։ Աւելցնենք, որ Տանի Քարպահալ 2013-էն հանդէս կու գայ Արքայական ակումբին հետ, մաս կազմած է 422 խաղի, նշանակած՝ 13 կոլ, կատարած՝ 64 կոլային փոխանցում։ Transfermarket-ը անոր փոխադրութեան արժէքը սահմանած է՝ 12 միլիոն եւրո:
ԱՆՏՐԷ ԼՈՒՆԻՆ ՊԻՏԻ ՄՆԱՅ ՌԷԱԼԻ ՀԵՏ ՄԻՆՉԵՒ 2030
Սպանիոյ ախոյեան եւ Չեմփիընզ Լիկի գաւաթակիր Ռէալ Մատրիտը իր պաշտօնական կայքէջին ճամբով յայտարարեց, որ երկարաձգած է 25-ամեայ ուքրանացի դարպասապահ Անտրէ Լունինի հետ պայմանագրութիւնը մինչեւ Յունիս 2030: «Երազանքը այլեւս իրականութիւն է։ Շնորհակալ եմ Ռէալին, որուն հետ առաջին օրէն ինքզինքս տանս մէջ կը զգամ։ Շնորհակալ եմ վստահութեան համար։ Ինծի մեծ աշխատանք կը սպասէ: Երջանիկ եմ, որ երկար տարիներ մաս պիտի կազմեմ աշխարհի լաւագոյն ակումբին։ Ասիկա լաւագոյն տեղն է անձնական եւ արհեստավարժ զարգացման համար։ Անցեալ մրցաշրջանին Անտրէ Լունին իտալացի Գարլո Անչելոթիի գլխաւորած խումբին հետ մասնակցած է 31 մրցումի։ Ան 12 մրցախաղի ընթացքին դարպասը անառիկ պահած է։ Transfermarket-ը Անտրէ Լունինի փոխարժէքը գնահատած է՝ 25 միլիոն եւրո:
Պատրաստեց Ռաֆֆի Սիւլահեան