-Վիեթնամի Հայփոնկ քաղաքին մէջ,  Ասիոյ զտման մրցումներու շրջագիծէն ներս, Սուրիոյ ֆութպոլի երիտասարդական հաւաքականը 4 – 0 արդիւնքով պարտութեան մատնեց Պանկլատէշը:

-Դամասկոսի մէջ սկսաւ Սուրիոյ պասքեթի Սուփըր 3-ի մրցաշարքը մասնակցութեամբ երեք սուրիական եւ հինգ արաբ ակումբներու: Մրցաշարքին իրենց մասնակցութիւնը կը բերեն Հալէպի Ահլին, Դամասկոսի Ուահտէն եւ Ճէյշը, Լիբանանի Պէյրութը, Անդրանիկը  եւ NSA խումբերը, Եգիպտոսի Զամալէք եւ Իրաքի Օդային զինուժի խումբը:

Ֆրանսայի Լիոն քաղաքին մէջ ընթացող ծանրամարտի երիտասարդներու աշխարհի ախոյեանութեան Հայաստան ներկայացնող Ալեքսանտրա Գրիգորեան դարձաւ  ծանրամարտի երիտասարդներու աշխարհի առաջնութեան պրոնզէ մետալակիր: 19-ամեայ մարզուհին կրցաւ նաեւ  հրումի վարժութեան տիրանալ արծաթէ մետալի՝ բարձրացնելով 110 քկ. ծանրաձող:  Յիշեցնենք, որ Ալեքսանտրա Գրիգորեան Մեքսիքայի մէջ ընթացող ծանրամարտի աշխարհի երիտասարդական ախոյեանութեան երկամարտի 188 քկ.  արդիւնքով դարձած էր  ոսկէ մետալակիր։

Սպանիոյ առաջնութեան 6-րդ փուլի մրցումներուն ախոյեան Ռէալ Մատրիտ 4 – 1 արդիւնքով պարտութեան մատնեց քաթալոնէական Սպանիոլ խումբը։ Առաջին կիսախաղը աւարտեցաւ 0 – 0 հաւասարութեամբ: 54-րդ վայրկեանին մրցակիցը ուժեղ հարուածով  կրցաւ ցնցել Քորթուայի դարպասը, որմէ չորս վայրկեան ետք Ռէալ Քարպահալի միջոցով  նշանակեց հաւասարութեան կոլը: Ռէալ շարունակելով իր խիտ յարձակումները տիրապետեց խաղարկութեան եւ 75-րդ վայրկեանին իտալացի Գարլո Անչելոթիի  գլխաւորած խումբը  առաջ անցնելով պրազիլցի Ռոտրիկոն արձանագրեց երկրորդ կոլը, որմէ 3 վայրկեան ետք Վինիսիոս Ժունիըր նշանակեց երրորդ կոլը: Արքայական խումբի կոլերու շարքը 90-րդ  վայրկեանին  տուգանային հարուածով աւարտեց ֆրանսացի Մպափէն։ Նոյն փուլի մրցումներուն Պարսելոնան, շարունակելով իր յաղթական երթը, 5 – 1 արդիւնքով պարտութեան մատնեց Վիլա Ռէալը: Քաթալոնէական խումբին կոլերը նշանակեցին Լեւանտովսքի՝ 2 կոլ, Ռաֆինիա՝ 2 կոլ եւ Փապլո Թորրէ՝ 1 կոլ: Աւելցնենք, որ հանդիպումի 20-րդ վայրկեանին, Պարսելոնայի դարպասապահ, գերմանացի թեր Շթիկըն ծանրօրէն վնասուելով դուրս եկաւ դաշտէն: Ըստ սկզբնական տեղեկութիւններու, անոր բացակայութիւնը նկատի առնուած է շուրջ 6-էն 8 ամիս: