Ֆութպոլի Ազգերու լիկայի C4 ենթախումբի որակաւորման վերջին փուլին, Հայաստանի հաւաքականը արտաքնայ խաղին մրցակից ունեցաւ Լաթվիոյ ընտրանին:

Հանդիպման մեկնարկային վայրկեաններուն, երկու խումբերը աշխոյժ էին թէ՛ պաշտպանութեան մէջ  եւ թէ՛ յարձակման գիծին վրայ: Խաղակիսուն միջնամասի վրայ տիրող դարձաւ  Լաթվիոյ հաւաքականը: Իսկ վերջին 9 վայրկեաններուն Հայաստանի ընտրանին տիրեց խաղարկութեան:

Երկրորդ կէսի մեկնարկին՝ 47-րդ վայրկեանին, ստանալով Լուքաս Սելարայանի փոխանցումը՝ Եդուարդ Սպերցեան գլխու շեշտակի հարուածով բացաւ հանդիպման հաշիւը: Լաթվիոյ հաւաքականը յաջողեցաւ վերականգնել հաշուին հաւասարութիւնը խաղի 71-րդ վայրկեանին: Խումբի կոլը արձանագրեց Ուլթրիկիսը: Բայց Հայաստանի ընտրանին 75-րդ վայր-կեանին կրկին յառաջացաւ: Վերջին պահուն գնդակը Լաթվիոյ դարպաս ուղղեց Արթուր Միրանեանը, արդիւնքը դարձնելով 2-1:

Հայաստանի հաւաքականը Լաթվիային յաղթելով մրցաշարքի ցանկին մէջ 2-րդ դիրքը գրաւեց:

Ատրպէյճան պիտի չմասնակցի 20-24 Նոյեմբերին Երեւանի Կարէն Տեմիրճեանի անուան մարզահամերգային համալիրին մէջ տեղի ունենալիք զինուորականներու ըմբշամարտի աշխարհի 37-րդ առաջնութեան։

Այս մասին ասուլիսի ընթացքին ըսած է Հայաստանի Հանրապետութեան Պաշտպանութեան Նախարարութեան զինուած ուժերու ֆիզիքական պատրաստութեան եւ մարզանքի ծառայութեան պետ, գնդապետ Արման Դաւթեան։

«Ռազմական մարզանքի միջազգային խորհուրդի ձեռնարկներուն հրաւէրները կ’ուղարկուին ոչ թէ կազմակերպիչ երկրին կողմէ,այլ խորհուրդին կողմէ եւ չի կրնար որեւէ երկրի հրաւէր զանց առնուիլ։ Ատրպէյճանի հաւաքականը յայտ չէ ներկայացուցած եւ  չէ ժամանած Հայաստան», յայտնած է ան։

Յիշեցնենք, որ առաջնութեան մասնակցելու նպատակով Հայաստան կը ժամանէ 24 երկրի պատուիրակութիւն։

Լիվըրփուլի կիսապաշտպան պրազիլցի Ֆետերիքո Քիեզա ձմռան հաւանաբար Իտալիա վերադառնայ։ Այս մասին կը յայտնէ Calciomercato-ն՝ յղում կատարելով Tuttosport-ին։

Աղբիւրի տեղեկութիւններուն համաձայն, միլանցիները մտադիր են 27-ամեայ ֆութպոլիստը վարձակալել ձմռան՝ մինչեւ մրցաշրջանի աւարտը զինք գնելու հաւանականութեամբ։

Կը յիշուի, որ միլանցիներու գլխաւոր տնօրէն Փեբէ Մարոտա լաւ յարաբերութիւններ ունի ֆութպոլիստի գործակալ Ֆալի Ռամատանիի հետ։ Անոնք ուղղակիօրէն կը բանակցին այս հարցին շուրջ։

Քիեզա Իւվէնթուսէն Լիվըրփուլ տեղափոխուած է անցեալ ամառ։