-Սուրիոյ ֆութպոլի դաշնութիւնը անցեալ շաբթուան ընթացքին յայտարարեց որ ֆութպոլի 2024 – 2025 տարեշրջանի մրցումները պիտի սկսին 10 Ապրիլին: Դաշնութիւնը իր անդրանիկ նիստով որոշեց նաեւ հաւաքականներու պատասխանատուներու եւ մարզիչներու անունները: Սուրիոյ ֆութպոլի  առաջին հաւաքականի մարզիչութիւնը պիտի շարունակէ սպանացի Խոսէ Լանան, բայց փոփոխութեան ենթարկուած են անոր օգնականներն ու կազմի պատասխանատուն:

-Սուրիոյ պասքեթի տղոց հաւաքականը ուղղուեցաւ Քաթարի մայրաքաղաք՝ Տաուհա, ուր պիտի ունենայ երկու մրցում՝ Իմարաթի եւ Պահրէյնի կազմերուն հետ:

Գամփռը դարձաւ Հայաստանի  2025 թուականին տեղի ունենալիք տափօղակով Հոքիի աշխարհի առաջնութեան պաշտօնական խորհրդանիշը: Այս մասին յայտնեց  Հոքիի դաշնութիւնը ընդգծելով, որ փորձագիտական դատակազմը ընտրեց հեղինակ Էլլա Ամատունիի վերոնշեալ խորհրդանիշը : «Գամփռը Հայկական լեռնաշխարհի բնիկ պահակ շուներու ցեղատեսակ է, որ յայտնի է իր ուժով, ճարպիկութեամբ եւ դիմացկունութեամբ։ Գամփռը ունի ամուր, հսկայ մարմին եւ հաստ մորթ, որ զինք կը  պաշտպանէ բոլոր եղանակային պայմաններէն: Ըլլալով հազուագիւտ ցեղատեսակ՝ ան դարձած է հայ ազգի իւրայատուկ խորհրդանիշը: Այդ իսկ պատճառով կը կարծեմ, որ գամփռը կատարեալ խորհրդանիշ է՝ Հայաստանը ներկայացնելու տափօղակով հոքիի աշխարհի առաջնութեան», ներկայացնելով իր աշխատանքը ըսաւ Էլլա Ամատունի:

Սպանիոյ մայրաքաղաքի Ռէալ Մատրիտի պատասխանատուները բողոք ներկայացուցին խումբի կիսապաշտպան Ժուտ Պելինկհամի հեռացման որոշումին դէմ։ Ան մրցավարին հանդէպ ունեցած արտայայտութեան համար կարմիր քարտով հեռացուած էր Լա Լիկայի 24-րդ փուլի Օսասունայի հետ տեղի ունեցած մրցումի ընթացքին: Ըստ  AS-ի տուեալներուն, Ռէալի ներկայացուցիչները վստահ են, որ Պելինկհամի արտասանած բառերը արժանի չեն խիստ պատիժի եւ կարմիր քարտի: Նախապէս Ռէալի գլխաւոր մարզիչ Գարլո Անչելոթի նոյնպէս յայտնած էր, որ անգլիացին որեւէ մէկուն վիրաւորական խօսք չէր ուղղած: Յիշեցնենք, որ հանդիպման 39-րդ վայրկեանին, գլխաւոր մրցավար Խոսէ Մունուէրա Մոնտերո հեռացուցած էր Պելինկհամը՝  զինք վիրաւորած ըլլալու մեղադրանքով: