Chat GPT-ն արհեստական բանականութեամբ աշխատող լեզուական միջոց  մըն է, որ կարողութիւն ունի զանազան  հարցումներու պատասխանելու, նաեւ նիւթի համադրում եւ թարգմանութիւն կատարելու: Որպէս օգտագործող՝ անհրաժեշտ է գիտնալ, թէ ինչպէ՛ս կարելի է առաւելագոյնս օգտուիլ Chat GPT-էն, որպէսզի  ճշգրիտ արդիւնք ստանանք:  Ստորեւ կը ներկայացնենք  խորհուրդներ եւ հնարքներ Chat GPT-ն արդիւնաւէտ ձեւով  օգտագործելու համար։

Chat GPT-ն կամ Generative Pre-trained Transformer 3-ը լայնածաւալ լեզուական միջոց մըն է, որ մշակուած է OpenAI-ի կողմէ: Ան կ’օգտագործէ ուսուցման խորունկ միջոցներ՝ մարդուն կատարածին նման գրաւոր նիւթ՝ թեքստ յառաջացնելու համար, այս միջոցը դարձնելով լեզուի ոլորտին մէջ աշխարհի ամէնէն յառաջադէմը:

Chat GPT-ն վերապատրաստուած է մեծաքանակ նիւթերու  տուեալներու վրայ, ներառեալ թուայնացած գիրքերու եւ յօդուածներու։ Այս պատճառով ալ երկվայրկեաններու մէջ տրուած հարցումներուն լայնածաւալ  եւ համահունչ  պատասխաններ կը պատրաստէ:

Chat GPT-ի գործածման ամենատարածուն ձեւերէն մէկը անոր հարցումներ տալն է: Chat GPT-ն կարողութիւն ունի  պատասխանելու զանազան հարցումներու։ Լաւագոյն արդիւնք ստանալու համար պէտք է յստակ եւ ճշգրիտ հարցումներ հարցնել անոր:

Խուսափեցէ՛ք անորոշ հարցումներէն, որոնք կրնան յանգեցնել տարատեսակ պատասխաններու: Ճշգրիտ բանաձեւեցէ՛ք, թէ ի՛նչ կը փնտռէք եւ տրամադրեցէ՛ք շարք մը տեղեկութիւններ, որպէսզի օգնէք Chat GPT-ին հասկնալու ձեր հարցումը:

Chat GPT-ն կարողութիւն ունի ստեղծել նիւթեր, եթէ անհրաժեշտ է գրել շարադրութիւն, յօդուած կամ զեկոյց: Chat GPT-ով նիւթ ստեղծելու համար պէտք է տրամադրել յուշում կամ նիւթ: Chat GPT-ն կը ստեղծէ համապատասխան եւ համահունչ նիւթ՝ հիմնուելով տրամադրուած յուշումներու վրայ:

Նիւթ ստեղծելու համար Chat GPT-ն գործածելու ընթացքին պէտք է ուշադրութեամբ վերանայիլ արդիւնքին՝ համոզուելու համար, որ ան  կը համապատասխանէ ձեր կարիքին: Թէեւ Chat GPT-ն կրնայ ստեղծել բարձրորակ նիւթ,  բայց ան միշտ չէ, որ կու տայ ակնկալուած արդիւնք, ուստի անհրաժեշտութեան պարագային պէտք է ստուգել եւ վերախմբագրել արդիւնքը:

Chat GPT-ն կը գործածենք նաեւ թարգմանութիւններու համար: Ան կը ծառայէ բազմաթիւ լեզուներու թարգմանելու, ինչպէս՝ անգլերէնի, սպաներէնի, ֆրանսերէնի, գերմաներէնի եւ չինարէնի: Լեզուներու թարգմանութեան համար Chat GPT-ին  մէջ մուտքագրեցէ՛ք արտայայտութիւն մը կամ նախադասութիւն մը մէկ լեզուով եւ ծրագիրը կը թարգմանէ զայն այլ լեզուներու:

Chat GPT-ի թարգմանութեան կարելիութիւնները կատարեալ չեն: Հարկ է ուշադիր վերանայիլ թարգմանուած արդիւնքին՝ համոզուելու համար, որ ան ճշգրիտ է եւ կը  համապատասխանէ ձեր կարիքին:

Եթէ ունիք երկար յօդուած կամ փաստաթուղթ, Chat GPT-ն կրնայ ձեզի օգնել աւելի կարճ եւ ամփոփ դարձնելու զանոնք: Chat GPT-ին նիւթը ամփոփել տալու համար մուտքագրեցէ՛ք նիւթը, այսպիսով Chat GPT-ն կը պատրաստէ կրճատուած տարբերակը:

Նիւթի ամփոփումները յատկապէս օգտակար են, երբ անհրաժեշտ է արագ վերանայիլ ծաւալուն տեղեկութիւններու: Այնուամենայնիւ, կարեւոր է ուշադիր վերանայիլ ամփոփուած նիւթին՝ համոզուելու համար, որ ան կ’արտացոլացնէ նիւթին հիմնական կէտերը: