Սուրիոյ նորակազմ կառավարութեան հիմնական մարտահրաւէրը պիտի ըլլայ երկրի տնտեսութեան բարելաւումը, որուն, սակայն, հարկ է որ սատարէ նաեւ ժողովուրդը, որովհետեւ ժողովուրդի զաւակները որքան ալ տարակարծիք ըլլան քաղաքականութեան մէջ, հարկ է որ գործակցին տնտեսական ծրագիրներու մէջ: Բոլորը կարիք ունին այնպիսի տնտեսութեան, որ կ’ապահովէ նուազագոյն կենսամակարդակ՝ արդար եւ ներառական տնտեսական համակարգի մը մէջ, զերծ փտածութենէ եւ մենաշնորհներէ։ Տնտեսութիւն մը, ուր երկրի բարիքները կը բաշխուին ողջ երկրի տարածքին, եւ ուր սուրիական աշխատուժն ու կենսուժը կը ներդրուին կայուն նախագիծերու մէջ։ Նախագիծեր, որոնք կրնան բարելաւել ժողովուրդին կենսամակարդակը եւ ստեղծել ազատ ու մրցունակ տնտեսութիւն։ Այս բոլորը բնականաբար երկրէն ներս ապահովութեան ու փոխվստահութեան ամրագրման պարագային։
Սուրիոյ տնտեսութեան ապագան, որ էապէս կապուած է անոր քաղաքական ապագային հետ, ենթակայ է շարք մը ազդեցիկ գործօններու, այդ կարգին՝ միջազգային, մասնաւորապէս ամերիկեան պատժամիջոցներու վերացումին, քարիւղի հոսքի ամբողջական վերականգնումին, քաղաքական համապարփակ կարգաւորումի ձեռքբերման, միջազգային, արաբական եւ տարածաշրջանային երկիրներու օժանդակութիւններու ծաւալին ու որակին եւ ներքին տնտեսական բարեփոխեալ ծրագիրներու յաջողութեան:
Կարճ ժամանակի վրայ, ներքին քաղաքական համապարփակ համաձայնութիւնները կրնան յանգեցնել պատժամիջոցներու աստիճանական վերացման, քարիւղի եւ կենսուժի մատակարարումներու արագ վերադարձին, միջազգային օգնութեան ծաւալի աճման եւ դրամավարկային ու մաքսային արմատական բարեփոխումներու: Միջին ժամկէտի հեռանկարին վրայ միջազգային դրամատուները կրնան վերսկսիլ Սուրիոյ մէջ իրենց գործունէութիւնը, միաժամանակ կրնան զարգանալ վերականգնումի ծրագիրները, արտադրողական ոլորտները, իսկ գաղթականները որոշ համեմատութեամբ մը կրնան վերադառնալ աշխատելու եւ նպաստելու տնտեսութեան անիւի թաւալումին։
Երկարաժամկէտ հեռանկարի վրայ Սուրիան կրնայ դառնալ տարածաշրջանային տնտեսական հանգոյց՝ ականատեսը ըլլալով տնտեսական կայուն աճի, ենթակառոյցներու համապարփակ բարեփոխման եւ համաշխարհային տնտեսութեան մէջ աստիճանական համարկման:
Ու թէեւ վերջին այս փուլը լուրջ կարելիութիւն կը ստեղծէ տնտեսութեան վերականգնումին համար, սակայն այս բեմագրութեան հասնիլը կը պահանջէ քաղաքական կամքով գօտեպնդուած ազգային համաձայնութիւն՝ ներքին ուժերու եւ ժողովուրդի բաղադրիչներուն միջեւ՝ տարածաշրջանային եւ միջազգային բարենպաստ պայմաններու ներքեւ:
Սուրիոյ վերականգնումը վերջապէս երկար ժամանակի վրայ կախեալ պիտի ըլլայ համաշխարհային տնտեսութեան մէջ անոր ընդգրկուելու պատրաստակամութենէն՝ առեւտրային համաձայնագրերու, տարածաշրջանային գործընկերութեան եւ դիւանագիտական ներգրաւուածութեան միջոցներու օգտագործումով:
Երկար ժամանակի վրայ համապարփակ եւ կայուն զարգացումը դժուար թէ իրականանայ առանց օտարերկրեայ դրամագլուխներու եւ արհեստագիտութեան հասանելիութեան: Այդուհանդերձ, սուրիական սփիւռքը եւ պետութեան դաշնակիցները կրնան նպաստել այս հանգրուանին հասցնելու երկիրը՝ սատարելով ոչ միայն Սուրիոյ, այլեւ տարածաշրջանի խաղաղ ծաղկումին։