ՀՅԴ ՆՈՐ ՍԵՐՈՒՆԴԸ ՓԱՐԻԶԻ ՄԷՋ ԲՈՂՈՔԻ ՑՈՅՑ ԿԸ ԿԱԶՄԱԿԵՐՊԷ ՖՐԱՆՔԵՒԱՏՐՊԷՅՃԱՆԱԿԱՆ ՀԱՄԱԳՈՐԾԱԿՑՈՒԹԵԱՆ ԴԷՄ

0

«Նոր Յառաջ».-ՀՅԴ Նոր Սերունդը որոշած է Չորեքշաբթի, 10 Յուլիսի երեկոյեան, Փարիզի մէջ, Արտաքին Գործոց Նախարարութեան շէնքին առջեւ ցոյց մը կազմակերպել, բողոքելու համար ֆրանքեւատրպէյճանական համագործակցութեան դէմ։

Այս առիթով ՀՅԴ Նոր Սերունդի հրապարակած հաղորդագրութեան մէջ կը վերյիշեցուի ֆրանսական արդարադատութեան՝ Արցախի հետ բարեկամութեան ուխտերու ջնջումի որոշումները ու կ՚ըսուի.-

«Ֆրանսա անգամ մը եւս կ՚ոտնակոխէ այն արժէքները, որոնք կոչուած են իրը ըլլալու։ Սոյն ուխտերը, որոնք պէտք է խորհրդանշէին ԲԱՐԵԿԱՄՈՒԹԻՒՆ-ը այդ (ֆրանսական եւ արցախեան) քաղաքներուն միջեւ, ջնջուեցան տնտեսական եւ քաղաքական նկատառումներով, այդպիսով տեղի տալով՝ ազերի մենատիրոջ պահանջներուն։ Ո՞ւր մնացին մարդկային իրաւունքները եւ Ֆրանսայի ազատ իրաւարարի հանգամանքը։

Բայց կայ դեռ աւելին։ Արդէն ծանօթ ենք Էմանուէլ Մաքրոնի Ֆրանսայի եւ մենատէր Ալիեւի Ատրպէյճանի տնտեսական կապերուն։ Ֆրանսա կ՚արտադրէ զէնքեր ու կը մատակարարէ Ատրրպէյճանին, որ կը գործածէ սպանելու համար մեր եղբայրներն ու քոյրերը։ Կեղծաւորութիւն է ասիկա։ Ներկայիս ալ կը տեղեկանանք, որ ֆրանսական Թալես ձեռնարկութիւնը Ատրպէյճանին պիտի մատակարարէ վերահսկողութեան եւ ձայնատեղաստուգումի(radiolocalisation) տարբեր տեսակի սարքեր։

Այս պատճառներով՝ ձեզի ժամադրութիւն կու տանք Չորեքշաբթի, 10 Յուլիսին, ժամը 18.30-ին ցոյց կատարելու Արտաքին Գործոց Նախարարութեան շէնքին առջեւ։

Վե՛րջ՝ ֆրանքեւատրպէյճանական քաղաքական-ռազմական գործակցութեան։ Վերյիշեցնենք ֆրանսական կառավարութեան իր պատասխանատւութիւնները։ Վերյիշեցնենք անոր, որ մարդկային արժէքները որքա՜ն աւելի կարեւոր են, քան դրամը։ Վերյիշեցնենք անոր, որ վաճառած զէնքերը կը գործածուին մեր եղբայրներուն ու քոյրերուն դէմ, որոնք կը պաշտպանեն մեր հողերը, ի գին իրենց կեանքին։

Պարո՛ն Մաքրոն, դադրեցուցէ՛ք ֆրանսահայ համայնքին հետ խաղալը։ Դադրեցուցէ՛ք խաղալը Արցախի մեր եղբայրներուն ու քոյրերուն կեանքին հետ, որոնք կը պաշտպանեն Արցախը»։

Share.

Leave A Reply