ՀՀ ԱՐՏԱՔԻՆ ԳՈՐԾՈՑ ՆԱԽԱՐԱՐՈՒԹԻՒՆԸ ԱՐՁԱԳԱՆԳԱԾ Է ԱՏՐՊԷՅՃԱՆԻ ԱՐՏԱՔԻՆ ԳՈՐԾՈՑ ՆԱԽԱՐԱՐՈՒԹԵԱՆ ՅԱՅՏԱՐԱՐՈՒԹԵԱՆ

0

ՀՀ Արտաքին Գործոց Նախարարութիւնը արձագանգած է Ատրպէյճանի Արտաքին Գործոց Նախարարութեան 6 Օգոստոս 2019-ին հրապարակած յայտարարութեան:
Հաղորդագրութեան մէջ յիշուած է.
«Ատրպէյճանի Արտաքին Գործոց Նախարարութեան 6 Օգոստոս 2019ի յայտարարութիւնն ակնյայտ ցուցադրում է քաղաքավարութեան եւ պարկեշտութեան հիմնական կանոններին հաւատարիմ մնալու, պետութիւնների միջեւ քաղաքակիրթ վարուելակերպի նորմերը, յատկապէս երբ դրանք վերաբերում են հակամարտութիւնների լուծման խիստ բարդ եւ զգայուն գործընթացում ամենաբարձր մակարդակով ներգրաւուած կողմերին, պահպանելու Ատրպէյճանի անկարողութիւնը: Յայտարարութեան մէջ առկայ անձնական բնոյթի յարձակումները դատապարտելի են եւ վկայում են Ատրպէյճանում հայ ժողովրդի նկատմամբ առկայ անհանդուրժողականութեան եւ ատելութեան մշակոյթի մասին, որն ուղղորդուում եւ խրախուսուում է Ատրպէյճանի իշխանութիւնների կողմից:
Ատրպէյճանի իշխանութիւնները, որոնք հետեւողականօրէն մերժում են Լեռնային Ղարաբաղի ժողովրդի եւ վերջիններիս կողմից ընտրուած իշխանութիւնների հետ որեւէ ուղղակի ներգրաւուածութեան հնարաւորութիւնը, որոնք էթնիկ զտումներ եւ այլ զանգուածային վայրագութիւններ են իրականացրել Լեռնային Ղարաբաղում 1990-ականներին եւ Ապրիլ 2016-ին, ովքեր հետեւողականօրէն որդեգրել են ատելութեան քաղաքականութիւն, այդ թւում հայերին սպանած մարդասպանների հրապարակային հերոսացման միջոցով, անմիջական պատասխանատուութիւն են կրում Արցախի ժողովրդի անվտանգութեան եւ գոյութեան համար վտանգներ ստեղծելու համար:
Հայաստանի Հանրապետութիւնը մնում է Արցախի ժողովրդի միակ երաշխաւորը` նրա անվտանգութեան, ազատութեան, մարդու անօտարելի իրաւունքների` ներառեալ զարգացման եւ ինքնորոշման իրաւունքի ապահովման գործում: Հայաստանն ափսոսանք է յայտնում, որ Ատրպէյճանի իշխանութիւններն անկարող են ընկալել Հայաստանի Հանրապետութեան վարչապետ Նիկոլ Փաշինեանի` 5 Օգոստոս 2019-ին ունեցած ելոյթի համատեքստը եւ բովանդակութիւնը, որն անդրադարձել է Հայաստանի, Արցախի եւ Սփիւռքի միասնականութեան, համերաշխութեան, զարգացման եւ բարգաւաճման համահայկական օրակարգի առաջմղմանը:
Աւելին, ՀՀ վարչապետը բազմիցս յայտարարել է, որ ղարաբաղեան հակամարտութեան խաղաղ կարգաւորման որեւէ կենսունակ տարբերակ պէտք է ընդունելի լինի Արցախի, Հայաստանի եւ Ատրպէյճանի ժողովուրդների համար: Ատրպէյճանի իշխանութիւնները, սակայն, հետեւողականօրէն չեն կարողացել փոխադարձել իրենց պատրաստակամութիւնը եւ կարողութիւնը` հասնելու բոլոր կողմերի համար ընդունելի կարգաւորման: Ատրպէյճանը շարունակում է հաւատարիմ մնալ իր առաւելապաշտական պահանջներին, որոնք ուղեկցուում են ուժի կամ ուժի կիրառման սպառնալիքով, շարունակաբար խախտում է հրադադարի ռեժիմը, անտեսում է խաղաղութեանը նպաստող մթնոլորտի ամրապնդման վերաբերեալ ԵԱՀԿ Մինսկի խմբի համանախագահների կոչերը եւ մերժում բոլոր կողմերի համար ընդունելի ցանկացած լուծում: Նման մօտեցումները հետեւողականօրէն արտացոլուում են Ատրպէյճանի ղեկավարութեան յայտարարութիւններում:
Խաղաղ կարգաւորման վերաբերեալ Հայաստանի դիրքորոշումը մնում է անփոփոխ, ինչը յստակօրէն արտացոլուած է ՀՀ վարչապետի վերոնշեալ ելոյթում: Հայաստանը հաստատակամ է հասնելու հակամարտութեան բացառապէս խաղաղ կարգաւորմանը` մերժելով ուժի կամ ուժի սպառնալիքի ցանկացած կիրառում, ինչպէս հաստատակամ է պաշտպանելու Հայաստանի Հանրապետութեան եւ Արցախի ժողովրդի անվտանգութիւնը»:

Share.

Leave A Reply