Կիլիկեան Ճեմարանի 2018-2019 տարեշրջանի միջնակարգի եւ երկրորդականի հանդէսը տեղի ունեցաւ Կիրակի, 14 Յուլիս 2019-ին, Ճեմարանիս երկրորդական բաժինի շրջափակէն ներս, հովանաւորութեամբ Կիլիկեան Շրջանակի Խնամակալութեան, կազմակերպութեամբ Ճեմարանի Տնօրէնութեան, Հոգաբարձութեան եւ ուսուցչական կազմին։
Հանդիսութիւնը բացուեցաւ Սուրիոյ եւ Հայաստանի զոյգ քայլերգներով, ապա ներկաները մէկ վայրկեան յոտնկայս յարգեցին Սուրիական Հայրենիքի եւ հայազգի նահատակները։
Հայերէն բացման խօսքով հանդէս եկաւ 12-րդ կարգէն Բիւզանդ Ճուլհայեան։ Ան ըսաւ, որ սոյն հանդիսութիւնը նուիրուած է Ամենայն Հայոց Բանաստեղծ Յովհաննէս Թումանեանի ծնընդեան 150-րդ ամեակին եւ գեղարուեստական յայտագիրը կը բովանդակէ մեծ բանաստեղծին ստեղծագործութիւնները։ Ապա ան աշակերտութեան անունով երախտագիտական խօսք ուղղեց բոլոր ուսուցիչներուն, որոնք անսակարկ նուիրումով իրենց լաւագոյնը տուին։
Արաբերէն բացման խօսք արտասանեց Իսա Ռազուք։ Ան, ողջունելէ ետք ներկաները, շնորհակալութիւն յայտնեց ծնողներուն եւ երկրիս վսեմաշուք նախագահ տոքթ. Պաշշար ալ Ասատին։
Գեղարուեստական յայտագիրի հայերէն բաժինը կ’ընդգրկէր Թումանեանէն ասմունքներ ու երգեր, իսկ արաբերէնը նուիրուած էր սուրիական մշակոյթին։
Այնուհետեւ, տնօրէնուհի տիկին Լիզա Մազմանեանի ձեռամբ տեղի ունեցաւ միջնակարգի եւ երկրորդականի հայերէն լեզուի ու մնացեալ առարկաներու մէջ գերազանց արդիւնք ապահոված աշակերտներուն պարգեւատրումը։ Ինչպէս նաեւ պարգեւատրուեցան 2017-2018 տարեշրջանի 9-րդ եւ 12-րդ կարգի պետական քննութեանց բարձրագոյն նիշը ապահոված աշակերտները։ Ապա տնօրէնուհին իր սրտի խօսքը արտասանեց եւ շնորհաւորեց շրջանաւարտներն ու իրենց ծնողները։Ան շնորհակալութիւն յայտնեց վարժարանիս հոգատար բոլոր մարմիններուն։
Շրջանաւարտ աշակերտները իրենց հրաժեշտի խօսքերը արտասանեցին, ապա տեղի ունեցաւ վկայականաց բաշխումը։
Հուսկ՝ 12-րդ կարգէն Յակոբ Նարինեան վարժարանիս բանալին յանձնեց մանկապարտէզի փոքրիկներուն, որոնք խոստացան անմար պահել Կիլիկեան կրթօճախին ջահը։
Հանդիսութիւնը փակուեցաւ Կիլիկեան Ճեմարանի քայլերգով, ներկայ բոլոր կիլիկեանցիներու միասնական երգեցողութեամբ։
Ցոլեր Ապաճեան