«Արմէնփրէս».-Պաշտօնական այցելութեամբ Սերպիա գտնուող Հայաստանի Հանրապետութեան նախագահ Արմէն Սարգսեան այցելած է Պելկրատի Միհայլօ Փուփինի անուան գիտահետազօտական հիմնարկը, որ կը համարուի տեղեկատուական եւ հաղորդակցութեան ճարտարագիտական ոլորտի առաջատար գիտահետազօտական հաստատութիւնը եւ ամենախոշորն ու ամենահինը հարաւարեւելեան Եւրոպայի տարածքին մէջ:
ՀՀ նախագահի աշխատակազմի հասարակայնութեան հետ կապերու վարչութենէն տեղեկացուցին, որ հիմնարկի տնօրէն Սանիա Վրանիէշ նախագահին ներկայացուցած է հիմնարկի գործունէութեան ուղղութիւնները` տեղեկացնելով, որ անոնք կ’ընդգրկեն հեռահաղորդակցութեան, անվտանգութեան եւ պաշտպանական, հաղորդակցութեան ենթակառուցուածքներու կառավարման եւ շարք մը այլ բնագաւառներ:
Յիշուած է, որ հիմնարկը ազգային գետնի կարեւոր ծրագիրներ կ’իրականացնէ` համադրելով երկրաչափական համակարգերն ու տեղեկատուական ճարտարագիտութիւնը, կը մշակէ նորարարական լուծումներ` մեքենական ինքնագործութեան եւ վերահսկման, հեռահաղորդակցութեան եւ համակարգչային ցանցերու ոլորտներէն ներս, ինչպէս նաեւ յաւելուածներ` էլեկտրոնային կառավարման տարբեր բնագաւառներու համար:
Հայաստանի նախագահը շրջած է հիմնարկին մէջ, ծանօթացած է իրականացուող հետազօտութիւններու արդիւնքներուն, տարբեր ոլորտներու մէջ առաջարկուող նորարարական լուծումներուն: Նախագահ Սարգսեան յայտնած է, որ հիմնարկի գործունէութեան շարք մը ուղղութիւններ հեռանկարային են փոխշահաւէտ գործակցութեան համար, որովհետեւ Հայաստան նոյնպէս բարձր ճարտարագիտական ոլորտի զարգացման մեծ ներուժ ունի: «Մեր շարք մը ընկերութիւններն ու գիտական հաստատութիւնները կրնան տարբեր ոլորտներու մէջ համագործակցիլ Ձեր հիմնարկին հետ», ըսած է նախագահ Սարգսեան: