Խամենէի . «Թրամփի Յայտարարութիւնները Մեզ Չեն Վախցներ, Եւ Ուաշինկթըն Մօտ Օրէն Պիտի Տեսնէ Իրանցի Ժողովուրդին Կեցուածքը»  

0

Իրանի գերագոյն հոգեւոր պետ այաթոլլա Ալի Խամենէի յայտնեց, որ իր երկիրը չի վախնար Միացեալ Նահանգներու նախագահ Տանըլտ Թրամփի սպառնալիքներէն` շնորհակալութիւն յայտնելով, որ ան «Ամերիկայի իսկական դէմքը բացայայտեց»:

«Իրանցիները Ուրբաթ օր իսլամական յեղափոխութեան տարեդարձին պիտի պատասխանեն Թրամփի սպառնալիքներուն», ըսաւ ան:

Միւս կողմէ, Իրանի արտաքին գործոց նախարար Մոհամետ Ճաւատ Զարիֆ յայտնեց, որ Իրանի հիւլէական թղթածրարին շուրջ գոյացած համաձայնութիւնը «մեր եւ Ամերիկայի միջեւ չէր, այլ բազմակողմանի համաձայնութիւն մըն էր: Ան իր խօսքը Թրամփին ուղղելով ըսաւ. «Արտաքին քաղաքականութիւնը կալուածներու առեւտուրէն տարբեր է, եւ կարծր կեցուածքիդ գինը պիտի վճարեն ամերիկացիները»:

Զարիֆ ըսաւ, որ միջազգային կացութեան բարդութիւնը Թրամփի նախընտրական խոստումներէն շատերուն կատարումը կը դարձնեն անկարելի` նշելով, որ միջազգային յարաբերութիւններու համակարգը ինքզինք պիտի պարտադրէ Թրամփի վարչակազմին:

Մինչ այդ, Իրանեան հիւլէական ուժանիւթի կազմակերպութեան ղեկավար Ալի Աքպար Սալեհի յայտնեց, որ երկու ամիս ետք պիտի յայտարարուին «հիւլէական» լուրեր` աւելցնելով. «Հիւլէական թղթածրարին շուրջ համաձայնութենէն ետք հիւլէական ճարտարագիտութեան մարզին մէջ գոյացած են կառավարական շարք մը ձեռքբերումներ, որոնք պիտի յայտարարուին 9 Ապրիլին` Հիւլէական ճարտարագիտութեան ազգային օրուան առիթով»:

Share.

About Author

Leave A Reply