ԽՄԲԱԳՐԱԿԱՆ՝ Փետրուար Բ./2017 Արդար Ընտրութիւն, Հզօր Հայաստան

0

Հայաստանի Հանրապետութեան Ազգային Ժողովի յառաջիկայ ընտրութիւնները կը հետաքրքրեն համայն հայութիւնը` Հայաստանի մէջ թէ Սփիւռքի, որովհետեւ այդ ընտրութիւններով կը բնորոշուի մեր հայրենիքին համընդհանուր զարգացման հեռանկարն ու ռազմավարութիւնը:

Հայաստանի մէջ իշխող կուսակցութեան եւ քաղաքական ուժերու կողմէ մղուող ընտրապայքարը, յատկապէս երբ երկիրը կը դիմագրաւէ պատերազմի վտանգ, մեծ պատասխանատուութիւն կը թելադրէ` ընտրապայքարին մէջ առաջնորդուելու երկրի ազգային շահերով ու տարածաշրջանի լարուած այս վիճակին մէջ չանսալու հայկական մեր իրականութիւնը պառակտող արտաքին հաւանական միջամտութիւններուն:

Այս ընտրութիւններուն համայն հայութիւնը պիտի հետեւի մեծ յոյսով ու լաւատեսութեամբ, որովհետեւ անոնք պիտի ընթանան նոր ընդունուած սահմանադրութեան օրէնքներով:

Վերջին շրջանին նոր ձեւաւորուած կառավարութիւնը եւս լաւատեսութիւն կը ներշնչէ, որովհետեւ երկրի զանազան ոլորտներու բարելաւման համար նորանոր ծրագիրներ կը մշակուին:

Այս բոլորը կը նախանշեն, թէ Հայաստանի խորհրդարանական ընտրութիւնները որակապէս եւ բովանդակային առումով պիտի տարբերին նախորդ ընտրութիւններէն:

Ընտրապայքարի նախօրեակին կը ստեղծուին նոր դաշինքներ, կը փոխուի կուսակցութիւններու մասնակցութեան ձեւաչափն ու ակնկալութիւնը: Սահմանադրութեան այս օրինակով քաղաքական բոլոր ուժերը  հնարաւորութիւն կ՛ունենան խորհրդարանին մաս կազմելու եւ երկրի զարգացման մէջ աւելի գործուն մասնակցութիւն բերելու:

Համաձայն հայրենի քաղաքական գործիչներու, այս ընտրութիւնները որակապէս պիտի գերազանցեն նախորդները, որովհետեւ կուսակցութիւններու եւ պատգամաւորական թեկնածուներու քարոզարշաւը ուղղուած պիտի ըլլայ ոչ թէ քաղաքական մրցակից ուժերը նսեմացնելու, այլ նրեկայացուած ծրագիրներով ընտրող զանգուածին վստահութիւնը շահելու: Նորամշակ սահմանադրութիւնն է որ կը թելադրէ ընտրութիւններու որակական այս նոր մակարդակը :

Կը մնայ յուսալ որ քաղաքական ուժերը ընտրապայքարի իրենց արշաւին մէջ յաղթելու գրաւը դնեն իրենց ծրագիրներուն վրայ, իսկ ժողովուրդը քարոզարշաւներուն հետեւի ներկայացուած ծրագիրներուն ծանօթանալով ու անոնց արդիւնաւէտութեան հաւատալով:

25-ամեայ անկախութեան փորձ ունեցող մեր հայրենիքը, կը հաւատանք, նոր հանգրուանի մը սեմին է, ուստի մեր բոլորին փափաքն է, որ այս հանգրուանը մեր երկիրը առաջնորդէ դէպի համընդհանուր զարգացում:

Լաւատեսութեամբ պիտի հետեւինք Հայաստանի ազգային ժողովի ընտրութիւններուն` առաւել արդար համակարգով, ազգային տեսլականով, արտագաղթի կասեցումով, Սփիւռքի ներուժին լայնատարած  օգտագործումով, Հայաստան-Արցախ-Սփիւռք եռամիասնութեան ամրագրումով աւելի հզօրացած տեսնելու մեր բոլորին պաշտելի հայրենիքը:

Share.

About Author

Leave A Reply