ԽՄԲԱԳՐԱԿԱՆ՝ Փետրուար Գ./2017 Սպառնալու Ձախաւեր Քաղաքականութիւն

0

Ատրպէյճան քրէական գործ յարուցեց պլոկըր Ալեքսանտր Լափշինին դէմ՝ անոր Արցախ այցելութեան եւ իր պլոկին ընդմէջէն Ատրպէյճանի սահմանապահ ծառայութիւնները եւ երկրին մէջ ընկերային անհաւասարութիւնը քննադատելուն պատճառով: Երեւոյթ մը, որ խստիւ դատապարտուեցաւ հայկական եւ ռուսական բեմերէ, ինչպէս նաեւ միջազգային իրաւապաշտպան «Միջազգային ներում» կազմակերպութեան կողմէ, ուր յստակօրէն նշուեցաւ թէ  հրապարակային կերպով պետութեան դէմ յայտարարութիւններ կատարելու  հիմնաւորումով քրէական գործի յարուցումը չունի որեւէ իրաւական հիմք, այլ ամբողջութեամբ կը տեղաւորուի խօսքի ազատութեան իրաւունքի ծիրին մէջ: Ատրպէյճանի այս արարքը սակայն արձագանգ չգտաւ Իսրայէլի կողմէ , հակառակ Լափշինի այդ երկրի քաղաքացին ըլլալուն:

Հաւանական է որ այս իմաստով ներքին համաձայնութիւն մը գոյացած ըլլայ Իսրայէլի եւ Ատրպէյճանի միջեւ ու վերջինս խոստացած ըլլայ ցուցական քանի մը գործողութիւններէ ետք ազատ արձակել Լափշինը, մանաւանդ եթէ նկատի ունենանք պլոկըրին ներում  հայցելու նամակը եւ անոր մօր խնդրանքը Ատրպէյճանի նախագահէն:  Հեռու չէ, որ Ատրպէյճան քանի մը օր ետք ազատ արձակէ Լափշինը՝ յոխորտալով որ կ’անսայ անոր ներում հայցումին. աւելին՝ ան իր այս «բարի» վերաբերմունքին համար նոյնիսկ գնահատանքի կրնայ արժանանալ որոշ շրջանակներու կողմէ:

Խորքին մէջ Ատրպէյճանին չեն նեղացներ ո՛չ իրեն հասցէին ուղղուած քննադատութիւնները, ո՛չ ալ սահմանը հատողները: Ատրպէյճանի միակ նպատակը Արցախ այցելութիւնը սահմանափակելն ու օտար լրագրողները հնարաւորինս Արցախէն ու արցախեան արդար պայքարի իրողութենէն հեռու պահելն է: Միայն այս ձեւով ան կարելիութիւն պիտի ունենայ շրջելու իրականութիւնները, արցախի ազատատենչ ժողովուրդը ներկայացնելու իբրեւ յարձակողապաշտ, իսկ Ատրպէյճանը՝ իբրեւ թէ անիրաւուած կողմ:

Ատրպէյճանի նախագահին ու վարչակազմին մտքով հաւանաբար չէին անցներ երկրէն ներս անարդարութիւններու դէմ ձայն բարձրացնող փոքրամասնութիւնները: Պատերազմի մշտական սպառնալիքով Ալիեւ կը յաւակնէր սքօղել երկրի ներքին հարցերը:

Ինչ իմանար սակայն, որ իր իսկ ծրագրած հակահայ քարոզչութեան փուճ ուղիին մէջ դէմ յանդիման պիտի յայտնուէր  ազգութեամբ թալիշ, Թալիշական Մշակոյթի Խորհուրդի անդամ, Թալիշական ազատագրական շարժման մասնակից, «Թոլիշի Սատօ» թերթի թղթակից Շահին Միրզոյեւին, որ  իր ընտանիքին հետ ստիպուած եղած էր փախչիլ Ատրպէյճանէն` ազգային եւ կրօնական փոքրամասնութիւններու նկատմամբ բռնաճնշումներու եւ անոնց իրաւունքներու կոպտագոյն ոտնահարումներու պատճառով, եւ ընտանիքով հասած էր Հայաստան ու բացայայտելով երկրէն ներս տիրող անարդարութիւնները՝ քաղաքական ժամանակաւոր ապաստանութիւն խնդրած Հայաստանէն:

Հայաստանի իշխանութիւնները դրական արձագանգեցին Շահին Միրզոյեւի խնդրանքին: Իսկ Ատրպէյճանին սարքած լափշինեան բեմադրութիւնը երեւան հանեց աւելի զգայուն քաղաքական հարց մը՝ փոքրամասնութիւններուն դէմ Ատրպէյճանի բռնարարքները:

Այս հարցերուն էութիւնն ու խորքը իմանալու համար միջազգային լրագրողներ հաւանաբար աւելի մեծ հետաքրքրութիւն ցուցաբերեն Արցախ այցելութեան նկատմամբ: Ահա թէ ո՛ւր կը կայանայ մեր լրատուամիջոցներուն մարտահրաւէրը՝ յանուն Արցախին ու անոր միջազգային ճանաչման առաւել գրաւիչ դարձնելու Արցախ այցելութիւնը:

«Գ.»

Share.

About Author

Leave A Reply