Հայկական Վարժարաններու Ասմունքի Մրցումը Այս Տարի Նուիրուած Է Արցախի Անկախութեան 25-ամեակին

0

«Ասպարէզ» օրաթերթը կը հաղորդէ, որ Միացեալ Նահանգներու Արեւմտեան թեմի Ազգ. առաջնորդարանի նախաձեռնութեամբ եւ կազմակերպութեամբ Ազգ. վարժարաններու խնամակալ մարմինին, յառաջիկայ Շաբաթ, 11 Մարտին տեղի պիտի ունենայ հայկական ամէնօրեայ վարժարաններու ասմունքի տարեկան երրորդ մրցումը, հովանաւորութեամբ առաջնորդ Մուշեղ արք. Մարտիրոսեանի:

Մրցումին մասնակցելու հրաւիրուած են ամէնօրեայ բոլոր վարժարանները:

Մասնակիցները բաժնուած են տարիքային երեք խումբերու. կրտսերներու խմբակը կազմուած է նախակրթարանի 4-րդ եւ 5-րդ դասարաններու աշակերտներէ, երկրորդը՝ միջնակարգի, իսկ երրորդը՝ երկրորդականի աշակերտներէ:

Ինչպէս նշեցինք, երրորդ տարին ըլլալով է որ տեղի կ՛ունենայ միջդպրոցական ասմունքի սոյն մրցումը՝ գործակցութեամբ «Շուշի Փլազա» ընկերութեան: Տարուէ տարի, այս նախաձեռնութիւնը հետզհետէ աւելի լաւ ընկալումի կ՛արժանանայ թէ՛ աշակերտներու, թէ՛ վարժարաններու դաստիարակներուն եւ թէ ծնողներուն կողմէ:

Այս տարի, մրցումին ժամադրավայրն է Ազգ. Վահան եւ Անուշ Շամլեան վարժարանի սրահը: Մրցումը պիտի սկսի առաւօտեան ժամը 9-ին ու պիտի երկարի մինչեւ յետմիջօրէի ժամերը: Դատական կազմի անդամ պիտի ըլլան արուեստագէտներ:

Նկատի ունենալով, որ այս տարի հերոսական Արցախը կը տօնէ իր անկախութեան 25րդ տարեդարձը, մրցումը ձօնուած է Արցախին. աշակերտներուն թելադրուած է ներկայացնել Արցախին նուիրուած կտորներ կամ հայրենասիրական բանաստեղծութիւններ: Անցեալ տարուան մրցումը, որ տեղի ունեցաւ Հայ Քոյրերու վարժարանին հիւրընկալութեամբ, նուիրուած էր Հայաստանի անկախութեան 25րդ տարեդարձին:

Share.

About Author

Leave A Reply