Լոս Անճելըսի Ազգ. Քարէն Եփփէ Ճեմարանականներու Ընկերակցութեան Հաղորդագրութիւն

0

Յարգելի Ճեմարանականներ,

2017 թուականը կը զուգադիպի Հալէպի Ազգ. Քարէն Եփփէ Ճեմարանի հիմնադրութեան 70՝ ու նաեւ Լոս Անճելըսի Ազգ. Քարէն Եփփէ Ճեմարանականներու Ընկերակցութեան 40-ամեակներուն։

Այս առթիւ, ընկերակցութիւնս կեանքի կոչած է յոբելենական յատուկ յանձնախումբ մը, որպէսզի արժանավայել կերպով յիշատակէ այս զոյգ եւ պատմական թուականները։

Հալէպի ազգ. մեր ճեմարանի ծնունդն ու ցարդ անոր ներկայութիւնը մեծ պատիւ մըն է ոչ միայն իր գաղութին, այլ համայն հայութեան։ Ազգային դաստիարակչական կենսական գործին մէջ եօթը տասնամեակներու վրայ երկարող իր բազմօգուտ ծառայութիւնները հպարտանք կ՚առթեն մեր բոլորին։

Ճեմարանը ազգային տեւականութեան ի խնդիր լոյս եւ գիտութիւն, ոգի եւ հայկականութիւն ներշնչող այն մեծ կրթարանն է, որուն շրջանաւարտները, իրենց ամբողջ կեանքի տեւողութեան զայն դարձուցին իրենց համար լուսաւոր փարոս։

Ահա թէ ինչո՛ւ նաեւ Լոս Անճելըսի մէջ չորս տասնամեակներ առաջ ծնունդ առաւ անոր անունը կրող մեր այս ընկերակցութիւնը, որպէսզի հազարաւոր մղոններ հեռու այս ափերէն, իբրեւ երախտապարտներ մնանք միշտ քաջալեր, գուրգուրացող ու մանաւանդ թեւ ու թիկունք կանգնող անոր բոլոր ծրագրումներու յաջողութեան աշխատանքներուն։

Ուստի Ճեմարանին եւ Ընկերակացութեան սրբազան եւ հայակերտ առաքելութեան ի խնդիր, մեր երախտագիտութիւնը պիտի հրապարակենք յատուկ հանդիսութեամբ Կիրակի, 29 Հոկտեմբեր, 2017-ին, կէսօրէ ետք, ժամը 5:00-ին, Կլէնտէյլի Իրանահայ Միութեան սրահին մէջ։
Հասցէ.- 117 S. Louise St. Glendale, CA 91205

Ջերմապէս կը խնդրենք, որ մօտէն հետեւիք մեր ծանուցումներուն՝ յաւելեալ տեղեկութիւններ ստանալու համար։

Յանձնախումբ

Share.

About Author

Leave A Reply