Հանրապետական Ժողովուրդի Կուսակցութիւնը Պիտի Դիմէ Թուրքիոյ Գերագոյն Ընտրական Խորհուրդին` Հանրաքուէի Արդիւնքները Ջնջելու Համար

0

«Ակօս» կը հաղորդէ, որ Թուրքիոյ գլխաւոր ընդդիմադիր ուժը` Հանրապետական Ժողովուրդի Կուսակցութիւնը պիտի դիմէ Գերագոյն ընտրական խորհուրդին` սահմանադրական փոփոխութիւններու վերաբերեալ հանրաքուէի արդիւնքները ջնջելու պահանջով:

Ընդդիմադիրները մատնանշած են տասնեակ հազարաւոր ընտրական տեղամասերու մէջ տեղի ունեցած ընտրական խախտումներու, ինչպէս նաեւ 2,5 միլիոնի հասնող չկնքուած քուէաթուղթերու հարցը:

Նախապէս Հանրապետական ժողովուրդի կուսակցութեան Պոլիսէն ընտրուած երեսփոխան Սենճէր Այաթա յայտարարած էր, որ հանրաքուէի ընթացքին չկնքուած քուէաթուղթերը, որոնք հաշուարկուած են իբրեւ «Այո»-ի քուէ, կազմած են 2,5 միլիոն:

Յիշեցնենք, որ նախնական տուեալներու համաձայն, Թուրքիոյ սահմանադրական փոփոխութիւններու վերաբերեալ հանրաքուէին յաղթանակ արձանագրած են կառավարման նախագահական համակարգի անցման կողմնակիցները, որոնք ապահոված են քուէներու 51,2 առ հարիւրը: Վերջնական արդիւնքները պիտի հրապարակուին 11-12 օրէն` բողոքարկումները քննարկելէ ետք:

Թուրքիոյ վարչապետ Պինալի Եըլտըրըմ, անդրադառնալով Հանրապետական Ժողովուրդի Կուսակցութեան կողմէ հանրաքուէի արդիւնքներու ջնջման դիմումին, յայտարարեց. «Թուրք ժողովուրդը իր կամքը արտայայտեց ազատօրէն, եւ ընդդիմութիւնը, մասնաւորաբար գլխաւոր ընդդիմադիր կուսակցութիւնը, պէտք է յարգէ ժողովուրդի որոշումը»: Ան ըսաւ, որ հանրաքուէի արդիւնքները կասկածի տակ առնելը անօգուտ է:

Share.

About Author

Leave A Reply